Центар за граѓански мониторинг ја презентираше својата студија „Компаративна студија за изборните недостатоци во Македонија и искуствата во регионот”, во Клубот на новинари.
“Идејата беше да споредиме со другите земји, да видиме какви решенија имаат тие за евентуално да ги примениме тие позитивни искуства и дадеме идеи како да се подобри оценката за изборите што се одржуваат во Македонија, едноставно да се зголеми демократичноста во земјата.”, изјави Жана П. Божиновска, една од авторките на студијата.
Според Центарот за граѓански мониторинг, Македонија има партизирано општество, што покажува дека присуството на политичките партии е преголемо и има преголемо влијание на се што ни се случува.
“Фокусот беше на финансирањето на политичките партии, на висината на донациите, на забраните околу донациите, казните, санкциите и контролата на донациите. Второ прашање беше како се прават избирачките списоци и како тоа е решено во европските земји. Третото прашање беше партизацијата на општеството и четвртото прашање беше начинот на кој што се регулирани државните изборни комисии.”, изјави Божиновска.
Околу финансирањето на партиите, генералната оценка, според меѓународните организации што ги следат изборите, е дека институциите кај нас што го контролираат финансирањето се хибридни, дека не се независни од власта ни од политичките партии и дека контролата кај нас повеќе е релулативна, отколку што се остварува.
Проектот на Центарот за граѓански мониторинг има финансиска поддршка од програмата Цивика мобилитас.
Ангела Петровска
