„Многу сум разочаран, затоа што по 25 години спорови за името на ‘Скопје’, ние сме на истата позиција. Психологијата и односот на многу грчки граѓани не се промениле. Проблемот е што луѓето сметаат дека Македонија ќе ни го одземе идентитетот. Никој нема тоа да го направи. Тие (Македонците – н.з.) не се закана за нас. Луѓето (во Грција – н.з.) се многу лошо информирани. Вообразуваат разни нешта кои не се вистина, дека тие ќе ни ја украдат историјата, ќе ни ја превземат“, изјавил според бугарската телевизија бТВ, солунскиот градоначалник Јанис Бутарис, додека според бугарските репортери, „со нескриена тага, ги набљудувал од својот кабинет“ илјадниците демонстранти – учесници на вчерашниот протест во Солун.
Агенцијата МЕТА пренесе дел од интервјуто на ексминистерот за надворешни работи на Грција, Теодорос Пангалос, за грчката телевизија „Скај“, во кое тој изјавува дека уште пред 25 години бил со став оти северниот сосед има право да се вика како што сака.
„Скопје нека се вика ако сака и Атина или Спарта, нека се викаат како сакаат, му кажав на Самарас во 1992 година“, изјавил Пангалос, кој како „правилна“ ја оценил позицијата на шефот на македонската дипломатија Никола Димитров – дека терминот Македонија не е ничија ексклузивна сопственост.
Според Пангалос, реакциите во Грција, дека „името Македонија не смее да се даде“, доаѓаат од „искомплексирани и сомнителни типови и кругови“.
Ц.М.
