Граѓанската иницијатива „Правда за Алмир – Drejtësi për Alimirin” најавува протести пред Владата на Р.М. утре, 21 март, 2018, со почеток во 13 часот. Граѓаните протестираат поради преквалификација на делото од убиство, во тежок престап со последици по имотот во сообраќајот, во случајот за малиот Алмир, којшто беше прегазен во јули 2016, од Бобан Илиќ, и како последица од тоа, почина. Иницијативата повикува на мирен и достоинствен протест пред Владата на Р.М.
„Ова е четвртиот протест што го организира граѓанската иницијатива „Правда за Алмир“ и се очекува да биде најмасовниот, затоа што доаѓа по решението за преквалификацијата на делото и ослободувањето од притвор на сторителот на убиството – Бобан Илиќ.
Свесни за зголемениот гнев на граѓаните од ова непрофесионално, тенденциозно и неправедно решение од страна на правосудните органи, апелираме за мирен и достоинствен собир пред Владата и да ги претставиме нашите барања за правда.
Слоганите, транспарентите и иконографиите што ќе бидат употребени на протестот содржуваат исклучиво повик за корекција на неправдата кон Алмир и барања за конечно функционирање на правдата. Од граѓаните што ќе ни се придружат на протестот бараме да не земаат со себе ништо друго освен една кукла или каква било играчка од нивните деца, како симбол на детската игра што прерано се прекина за малиот Алмир, првично од раката на убиецот, и повторно од раката на правниот систем во земјата. Ќе протестираме мирно, следејќи го примерот на семејството на малиот Алмир, нивната смиреност наспроти болката од загубата на најмилото и повторното убивање на секое судско рочиште, и најкобното – на преквалификацијата. Алмир повторно го усмрти правниот систем заробен од политичките и други структури. Како што протестиравме до сега, како на погреб, така ќе протестираме и во среда. Погребната тишина е појака од илјада крици!
На 21 март, во 13 часот пред Владата на Република Македонија, ќе се протестира мирно против гнилата правда на Македонија. Ќе протестираме за да им ставиме крај на пролетите без правда“, стои во повикот на иницијативата „Правда за Алмир – Drejtësi për Alimirin“.
Дијана Тахири
