Претседателот на Демократската унија за интеграција, Али Ахмети, вчера во општина Боговиње побара поддршка за победа за кандидатот за градоначалник Берзат Бејтулаху-Хаки на локалните избори во недела.
Според Ахмети ДУИ е најподдржана сила со најмногу гласови од Струга до Куманово и Липково.
Тој повика на ангажман со посветеност на сите политички структури, со цел, како што рече, на 29 октомври да се обезбеди убедлива победа за сите граѓани на Боговиње.
Во исто време, Ахмети оцени дека нивните политички опоненти се без никакви програми и визии за иднината.
„ДУИ работеше и работи за политичка стабилност во земјата и тоа е гаранција дека работата на локалната власт во следниот мандат ќе биде уште поуспешна“, наведе Ахмети.
При престојот во Боговиње, Ахмети, го посети семејството на починатиот градоначалник на оваа општина, Хазби Идризи. Лидерот на ДУИ го посети и селото Пирок каде пред присутните посакува и вториот круг од локалните избори да помине без проблеми, и без, како што вели, поделби.
„Вредностите се изградени од вредности и ние не сакаме да произведеме антивредности во нашите простории“, рече Ахмети додавајќи дека ДУИ од нејзиното основање до денес има инвестирано во создавање кадри кои излегле во пресрет на албанското прашање и на задачите со одговорност на државно ниво.
„Ние сме луѓе кои сме создале идентитет и национално достоинство, и сме почитувани насекаде“, изјави Ахмети оценувајќи дека новата коалиција по првиот круг на изборите на опозицијата е коалиција за самоспасение.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
