Парламентариот спикер Талат Џафери е дециден дека формирањето на 10 пратенички групи од ВМРО-ДПМНЕ не е пречка, согласно со Деловникот на Собранието. Но, како што вели, правно-политичкото дејствување на овие групи ќе биде дискутабилно. Тој не сака да прејудицира какви било оценки во моментов, но вели дека ќе го следи нивното практицирање на парламентарна демократија во законодавниот дом.
„Од формален аспект, согласно со Деловникот, пет пратеници од иста или различна партија формираат пратеничка група. Во конкретниот случај, тие изразија волја и се екипираа по пет пратеници. Но, таквиот начин на искажана волја, ги отвора проблемите внатре во ВМРО-ДПМНЕ. Јас тоа нема да го коментирам, дали сите пратеници се во ВМРО-ДПМНЕ, или се решиле ова да им биде отворен пат за заминување, ДПМНЕ да го заменат со НП или со не знам кое друго ВМРО?!? Зашто, коалицијата е предводена од ДПМНЕ, а во државата се регистрирани повеќе партии под името ВМРО. Е, сега, како ќе го разберат тоа гласачите на ВМРО-ДПМНЕ, дали им се распаднала пратеничката група, или што се случило? Сепак, тоа е политичкиот дел од прашањето, што им го оставам на гласачите“, изјави спикерот Џафери за ЦИВИЛ Медиа.
Тој потсетува дека формирањето на повеќе пратенички групи од една коалиција не е новина во парламентарната практика.
„Во периодот од 2011 до 2014, во коалицијата што ја предводеше СДСМ, беа и НСДП и ПЕИ. Тогаш беа формирани три пратенички групи со тројца координатори. Но, сега разликата е што сите пратенички групи ја имаат премисата ДПМНЕ: Прва пратеничка група на ВМРО-ДПМНЕ, втора пратеничка група на ВМРО-ДПМНЕ… Спорот од правен аспект е додавката ‘ДПМНЕ’ на сите. Службите на Собранието ќе работат натаму, дали тоа ќе може и како ќе може да функционира“, посочува Џафери.
Според него, нема потреба да се отвори собраниска дебата на оваа тема.
„Очекувам да се однесуваат нормално. Ако се однесуваат поинаку, тогаш тоа е работа, за мое размислување“, порачува Џафери.
Моника Талеска
