Министерот за култура, Роберт Алаѓозовски, на денешната прес-конференција во министерството, изјави дека Владата на Република Македонија ја усвоила стратегијата за развој на културата за 2018 – 2022 година и акцискиот план со кои и практично ќе го отворат процесот на темелни реформи и обнова на културниот систем во Република Македонија.
„Во изминатите месеци спроведовме повеќеинституцијални акции со кои го спречивме пропаѓањето на културниот систем во повеќе сегменти, како и непродуктивното трошење на парите на граѓаните. Изменивме 4 закони, го запревме пропаѓањето на културното наследство, ги оневозможивме клиенталистичките привилегии и стопиравме да се одлеваат пари за проектот „Скопје 2014“.
Министерот додаде дека клучните сегменти од акцискиот план, како децентрализација на културата, заштита на културното наследство и музеите, поддршка на граѓанскиот и на независниот културен сектор, интердисциплинарните уметности, културните и креативните индустрии, се веќе во напредни фази за подготовка.
Во соработка со Министерството за локална самоуправа и Министерството за финансии ќе се засилат активностите за создавање фискални услови и зголемување на парите што општините ги добиваат преку блок донациите за култура.
„Заштитата на културното наследство и музејската дејност по долгогодишната негрижа преставува наш врвен програмски приоритет. Ќе се спроведе ревизија на состојбите во установите и во управата за заштита на културното наследство. Ќе се изработи стратегија за заштита и подготовка на нов закон за заштита на културното наследство.“ додаде Алаѓозовски.
Годинава ќе се работи на основање на одделение за развој и финансирање на современи независни интермедијални и интередисциплинарни културни и уметнички практики. Кај самостојните уметници, ќе се изврши ревизија на доделениот статус на самостоен уметник, либерализација на условите и постапките и стимулирање на поголем број самостојни уметници како суштински придонес во поддршката на уметничкото творештво.
Реформи се предвидени и за филмската и библиотечната дејност, како преиспитување на законското решение за финансирање на Агенцијата за филм, со цел да се дојде до праведно решение за сите засегнати страни и измени и дополнувања на Законот за библиотеките и подготвување подзаконски акти од областа, во Законот за издавачка дејност, како и дополнувања на Националната класификација на културното наследство.
А.П.
