Лидерот на најголемата опозициска сила, Демократската партија, Љуљзим Баша денеска најави одржување масовен протест на 27 јануари.
Тој ги повика сите албански граѓани да и се придружат на опозицијата на 27 јануари, сабота во 12 часот на сенародниот протест против, како што рече, сиромаштијата, економската криза, против неправдата и правосудството кое е под заложништво на политиката. Посочи дека Албанија денеска е претворена во нарко-држава.
„Доколку денеска имаме нарко држава што се потврдува и од штотуку објавениот извештај на ЦИА и САД, оваа нарко држава е изградена на темелите на беззаконие, кое е основа на украдени избори, што доведе до нелегален парламент, незаконски премиер, кој нелегално постави главен обвинител за да може да ги затвори досиејата за корупција“, истакна Баша.
Коорднаторот на парламентарната група на Демократска партија, Еди Палока, обвини дека премиерот Еди Рама е вистинскиот виновник за многуте злосторства, дрога и корупција во земјата.
„Целта на протестите е најпосле да се отстрани Рама од функцијата. Тој не смее да биде премиер на Албанија“, наведе тој, велејќи дека го пренесува ставот на опозицијата.
Палока ја коментираше и оставката на генералниот директор на албанската полиција Хаки Чако,оценувајќи дека „Рама е оној што всушност треба да ја напушти функцијата бидејќи тој ги контролира сите функционери“.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
Одговорноста за редакциското опремување на текстовите (наслов, наднаслов, фотографија, тагови) е на ЦИВИЛ Медиа.