„Судот сакајќи да воспостави „праведност“, по вторпат го уби малиот Алмир, давајќи му минимална казна на убиецот Бобан Илиќ како и осудувајќи ги и семејствата на малиот Алмир“, реагира БЕСА по пресудата шест години затвор за Илиќ и шест месеци затвор за таткото на Алмир.Во реакцијата на БЕСА се вели дека со овој случај се докажува дека судството во Македонија сè уште е селективно и непрофесионално и дека одлуките се засноваат врз основа на етничката припадност на странките.
„Ја потсетуваме јавноста кога младиот Насер Ештрефи го уби во самоодбрана неговиот врсник Македонец, и покрај фактот дека беше малолетник и требаше да се почитува тоа од судот, повторно беше осуден на 14 години затвор, додека убиецот на Алмир, кого јавноста го гледаше и преку видео снимки, доби олеснителна казна што во нормални европски држави со развиена демократија и професионална правда ќе беше осуден на доживотен затвор“, се вели во соопштението.
БЕСА побара јавниот обвинител во Македонија, Љубомир Јовески, од морални причини да поднесе оставка од функцијата, а од Републичкиот судски совет побараа да се превземат мерки против судијата кој ја донесе пресудата.
„Со ова правосудство тешко дека може да очекуваме интегрирање во НАТО и во ЕУ. Владеењето на правото беше еден од нагласените сегменти во сите извештаи на ЕУ и НАТО и затоа Владата треба сериозно да пристапи кон темелните реформи во континуитет за да не се повторуваат монтирани случаи и неправедни пресуди, како што е последниот случај со малиот Алмир“, велат од БЕСА.
ЦМ
