БИЉАНА ЈОРДАНОВСКА
Она што сите го чекаат се изборните реформи. Натамошно кршење копја зад затворени врати, преку усогласувањето на препораките на ОБСЕ/ОДИХР, може да значи позитивен исчекор во демократскиот процес наречен избори или уште една причина за блокирање на Собранието. Но, за нив ќе се чека есента.
Во меѓувреме, темата избори е доволно актуелна за медиумите, а уште повеќе за политичките партии. Тежината на изборните реформи, во овој случај не значи ништо, затоа што изборните калкулации и аспирации се резултат на амбициите и желбите на поединци или политички партии.
Сања Лукаревска, директорка на УЈП, изјави дека, иако СДСМ се подготвени за предвремени парламентарни избори, сепак, со тоа ништо не се постигнува. Таа е оптимистка дека партијата ќе излезе како победник на редовните парламентарни и претседателски избори. Она што останува е да се завршат летните одмори и уставните измени. И ова е генерално прифатен став на СДСМ, како владејачка пратија, од кој не отстапуваат.
ВМРО-ДПМНЕ, од другата страна, со сосема спротивни ставови и аргументирања, исто така се оптимисти. Нивниот оптимизам почива на желбата за предвремени парламентарни избори. И за нив останува да поминат летните одмори и уставните измени, за кои допрва треба да донесат конечна одлука дали се ЗА или ПРОТИВ.
Секако, Мицкоски во своето аргументирање, потребата од предвремени парламентарни избори го поткрепува со трите опции: претседателски во март, а парламентарни во јуни, едни заеднички или брзи избори наесен, годинава.
Во меѓувреме, во предизборна година, турбуленции и во албанскиот блок. Прашањето што ќе се прави со ДУИ и ДУИ што ќе прави самото со себе, останува отворено.
Претседателот на Алијанса за Албанците, Арбен Таравари, во интервју за ЦИВИЛ Медиа, нагласи дека албанскиот блок после 20 години има потреба за промени за да дојде една нова генерација на политичари Албанци. Според него, АА се алтернативата која Албанците ја гледаат како политичка партија која треба да ја смени ДУИ.
Мицкоски, на иста линија за смена на ДУИ. Нивните анализи го кажуваат тоа, иако не навлегува кој би бил достоен во албанскиот блок да ги смени. Можеби тоа ќе биде Алијанса, но за тоа Мицкоски ќе треба да биде подготвен да комуницира.
Пораката од Таравари е: „Ставот на Мицкоски дека не комуницирам со партии од владеjачкото мнозинство е многу ригиден и неполитички.“
Во таа своја не-комуникација, Мицкоски очекува позитивен одговор од Владата за предвремени избори, додека уште им е свежа изборната програма што ја крчкаат. За да нема забуни, Мицкоски за Алсат-М вели: „Единствената понуда која ја очекувам од владата е час поскоро да биде распуштен парламентот и да одиме на предвремени парламентарни избори.“
Програмата на ВМРО-ДПМНЕ ќе се заснова на „нула толеранција за криминал и корупција“? Ако се слушаат изјавите на Мицкоски, така некако ќе настапат на изборите, кога и да се одржат. Во некоја следна изјава на Мицкоски, би било вистинско освежување и летен хит, ако се слушне дека ѝ e благодарен на власта за чистката од криминалци и корупција што ја прави во ВМРО-ДПМНЕ.
Назад на ДУИ, генералниот совет на партијата, на предлог од претседателот на партијата Али Ахмети, го избра Бујар Османи за потпретседател на ДУИ и уште тројца нови членови на претседателството, како замена на оние што ја напуштија партијата.
А како пратеници на ДУИ во Собранието, функцијата ја напуштија Изет Меџити (кој најави формирање на ново политичко движење), Мерита Колчи Коџаџику и Кастриот Реџепи.
Внатрепартиските превирања во ДУИ, може да си останат само тоа, но може и да ја сменат перцепцијата на граѓаните за „зелената“ ДУИ на изборите, по што постои можност тие и формално да заминат во опозиција.
СДСМ активно се „Рамо до рамо“ со граѓаните, а свои активности далеку пред официјалното закажување на изборната трка, имаат и другите политички партии.
Некои, како на пример, Левица, објавуваат на социјалните мрежи дека локално се среќаваат со граѓани, или одат на протести против Иловица, вандализираат јавни површини, како што е „Паркот на Украина“ во Општина Чаир…
За сите предизборни активности заслужна е ЕУ. Евроинтеграцискиот пат што земјата го зацрта и треба да го изоди, бара стабилизирање на политичките односи, комуникација и прифаќање на состојбите без премрежето на политичкото слепило. Од кое, за жал, страдаат голем број политички субјекти во земјата.
Текстот е личен став на Авторката. Дозволено е преземање на текстот според лиценцата Creative Commons 4.0.
