Притвореник во затворот Скопје, починал во петокот на 24 февруари. Како што е наведено во соопштението на МВР, притворениот Р.А. бил од Струмица. Во петокот му се слошило и по укажаната помош од лекарот во затворот, била повикана итна медицинска помош, со цел да биде пренесен во Градската општа болница „8 Септември“. Р.А. починал пред да стигне во болницата, а Јавното обвинителство наредило телото да биде предадено на обдукција, по што ќе биде констатирана причината за смртта.
За помалку од два месеца, ова е четврти смртен случај во затворите во Македонија. Претходно, во јануари, во Казнено–поправниот дом „Идризово“, почина затвореникот М. С. (46). Истиот месец, на 10 и 11 јануари, починаа 73 -годишникот М.А. од Гостивар и 56 -годишникот С.Р од гостиварското село Речане, кои исто така, служеле затворска казна во Идризово.
Од канцеларијата на Народниот правобранител, како што информираат за ЦИВИЛ Медиа, сè уште се подготвува извештајот за работата од 2016-та година, каде што ќе бидат опфатени условите во кои затворениците ја отслужуваат казната, притворот и проблемите со кои се соочуваат.
Народниот правобранител, Иџет Мемети, неодамна во интервју за Радио Слободна Европа, констатира дека во 2016 година „има уназадување или има помасовно прекршување на правата на граѓаните“. Во делот на повредите на човековите права, тој посочува дека проблемите со затворите се посебна приказна.
Според извештајот на Советот на Европа од март 2016-та година, смртноста на затворениците во Македонија е 45,7 затвореници на 10.000, а во Европа средната смртност е 31,3. Самоубиствата претставуваат 3,5 на 10.000, а во Европа средната бројка е 5,4. Истиот извештај, посочува дека македонските затвори се меѓу најгусто „населените“ во Европа. Заклучно до први јануари 2016та година, вкупниот број на затвореници во земјава изнесувал 3.427 лица.
На веб-страницата на Управата за извршување санкции нема податок за бројот на починатите лица во затворите во Македонија. Исто така, нивниот годишен извештај за 2016 година сè уште не е објавен.