„Изборите се важни, но важни се и деновите после нив. Важно е да се спроведат и итните реформи кои ги наметна извештајот на Прибе и тие што произлегоа од Договорот во Пржино. Важно е да имате добро подготвени и спроведени избори, за да не може никој да ги критикува. По изборите ќе има извештај на ОБСЕ/ОДХР за целиот нивен тек“, изјави денеска еврокомесарот за проширување Јоханес Хан, по разговорите со лидерите на четирите политички партии-потписнички на Пржинскиот договор, со Специјалната јавна обвинителка Катица Јанева и со претставници на граѓанскиот сектор.
Посетата на Хан во Скопје, започна утрово со средба со претставниците на граѓанските организации, со кои се разговараше, помеѓу другото, и за улогата и мандатот на Специјалното Јавно обвинителство. Невладиниот сектор на средбата го застапуваше ставот дека е неопходно да се формира независно судско одделение што ќе работи на процесуирање на случаите на СЈО, но потребно е целосно да се распушти Судскиот совет и повторно да се избере нов состав, за да се обезбеди непристрасност.
Во пресрет на денешната посета, ЦИВИЛ- Центар за слобода, уште еднаш потсети на ставовите и препораките кои се однесуваат на условите за слобони и фер избори и ги претстави итните чекори и мерки за спроведување барем делумно слободни избори.
Хан имаше средби и со премиерот Емил Димитриев, со обвинителката Катица Јанева и со лидерите на четирите политички партии, Мендух Тачи, Али Ахмети, Зоран Заев и Никола Груевски.
Работата на СЈО беше главната тема околу која разговараа Хан и Јанева. По средбата, Хан изјави: „Работата на Специјалната обвинителка не треба да се злоупотребува, а секој треба да придонесе нејзината работа да биде независна“.
„Разговаравме за проблемите со кои се соочувавме во минатото, а зборувавме и за тоа како ќе функционираме во иднина и на кој начин ќе го продолжиме нашето дејствување“, е краткиот осврт кој за јавноста го сподели Јанева, непосредно по завршувањето на средбата.
Средбата Хан- Димитриев, беше посветена на изборите кои претстојат но и на интеграцијата на Македонија во Европската унија.
„На средбата беше истакната значајноста и потребата за членство на Република Македонија во ЕУ, при што беше истакната заложбата на двете страни за реализација на реформите кои се потребни за унапредување на стандардите кои се од значење за нашите европски интеграции. Претседателот на Владата истакна благодарност до ЕУ за соработката во процесот на спроведување на реформите“, е соопштението кое го објави кабинетот на Димитриев.
Со лидерите на четирите политички партии Јоханес Хан одржа одвоени средби.
„Изразена е заедничка согласност дека е неопходно сите политички партии и институции, вклучувајќи го и Собранието, да ја испочитуваат обврската за слободни, фер и регуларни избори на 11-ти декември“, стои во соопштението кое СДСМ го објави по завршувањето на средбата на Заев со Хан.
Со соопштение до јавноста се обрати и владејачката ВМРО–ДПМНЕ: „Груевски посочи дека изборите се единствениот начин за излез од политичката криза, а за веродостојноста на целокупниот процес и градењето на доверба, потребен е ангажманот и придонесот на сите полички субјекти“.
„Имавме многу добра средба со Хан и заеднички став е дека веќе постигнатиот договор треба да се почитува од сите. Тоа е клучно за да се одржат фер и демократски избори“, изјави Али Ахмети, по завршувањето на средбата со Хан.
„Со комесарот Хан разговаравме дека нашиот став е дека дел од условите за фер и демократски избори се исполнети“, е ставот на Мендух Тачи по средбата со еврокомесарот.
На крајот од денешните средби, Хан дополни дека Македонија доби позитивна оценка за справувањето со мигрантската криза и дека земјата треба да го искористи тој момент за да се врати на европскиот пат.
ЦИВИЛ Медиа
