Хелсиншкиот комитет за човекови права излезе со Годишен извештај за криминалот од омраза во 2016. Според извештајот, во споредба со 2015, минатата година има зголемување од 60% во бројот на инциденти чиј поттикнувач е омразата.
Најголем број од инцидентите биле регистрирани од медиумите или од Министерството за внатрешни работи, а само три биле пријавени од Хелсиншкиот комитет. Во 2016 година биле регистрирани вкупно 70 злосторства од омраза!
Според извештајот, најмногу инциденти се случиле во Скопје, а мал дел, во близина на автопатот по кој бегалците и мигрантите се движат на својот пат до Европската унија. Некои злосторства од омраза се извршени како одмазда, или како казна за претходни инциденти од млади лица, а се од меѓуетнички карактер.
Бегалците и мигрантите што транзитираат преку територијата на земјата и во 2016 биле изложени на голем
ризик да станат жртви на злосторства од омраза.
Во извештајот е констатиран зголемен интензитет на говор на омраза кај политичарите за време на јавни дебати и во текот на предизборните кампањи, што доведува до извршување на злосторства од омраза од страна на нивните поддржувачи.
Според препораките во извештајот на Хелсиншкиот комитет, треба да се преземат соодветни мерки за да се олесни пријавувањето злосторства од омраза од жртвите и, исто така, колку што е можно повеќе, да се зајакнат здруженијата за нивна поддршка, вклучувајќи и мерки за градење доверба кај полицијата и кај другите државни институции.
Искуствата на земјите-членки на ЕУ за проширување на опсегот на казниви дела за злосторства од омраза во рамките на нивното кривично законодавство, со вклучување на други мотиви за пристрасност за овие дела, како и навремена и ефикасна истрага и гонење на злосторствата од омраза, земајќи ги предвид мотивите за пристрасност во текот на целата кривична постапка се, исто така, дел од препораките во Извештајот.