Дваесет граѓански организации кои во изминатите пет месеци речиси секојдневно беа изложени на ревизија и контрола во својата работа, денеска на прес-конференција ја информираа јавноста за притисоците со кои се соочуваат.
„Уште во декември започнаа првите организирани контроли врз нашите организации од страна на повеќе институции. Во истиот период, тогашната владеачка партија ВМРО-ДПМНЕ јавно повика на прогон врз граѓанските организации, што дава причина да веруваме дека овие контроли не се рутински, туку наменски, и со цел да им наштетат на нашите организации“, се вели во заедничкиот став на организациите.
Како пример, се наведува фактот што шест различни институции вршеле неоснована контрола.
Се работи за Управата за јавни приходи, Финансиската полиција и Министерството за внатрешни работи. на барање на Јавното обвинителство, а според невладините организации, и Агенцијата за финансиско разузнавање и Државната комисија за спречување корупција имаат преземено акции.
„Се јавуваат и првите случаи на неправедни и конструирани казни врз организации кои со години наназад работат и помагаат на најранливите и најсиромашните граѓани“, посочуваат граѓанските организации што се соочуваат со истиот проблем. Тие предупредуваат дека со овие акции се ризикува Македонија да ја загуби и меѓународната финансиска помош со која се потпомагаат институциите и граѓаните.
На прес-конференцијата беа претставени неколку барања адресирани до новата влада:
„Бараме од новата власт и институциите, овој притисок на коj неправедно и намерно се изложени нашите организации – да запре веднаш! Бараме да се провери основаноста на контролите и да се истражи злоупотреба на службената должност за политички притисок и дискриминација. Бараме изречените казни и записниците од овие случаи да бидат поништени!“
Граѓанските организации се загрижени поради информацијата дека досегашната Влада доделила 800.000 евра за граѓански организации.
„Техничката влада во заминување нема морално право и мандат да носи вакви одлуки. Намерата е очигледна, затоа што повикот беше отворен среде политички прогон врз невладините, а истовремено, истата влада сака да додели фонд повисок од било кој што го оддвојувала – за невладини организации. Додека минатата година се потпишувале договори до 5.000 евра сега се покачени до 50.000 евра!“, истакнаа организациите кои бараат поништување на оваа одлука.
