Истражувањата покажуваат дека тврдокорните политички верувања се шират надвор од традиционално десничарските демографски групи. Новиот извештај на германски тинк-тенк детално го прикажува порастот на десничарскиот екстремизам низ целата земја, додека спомениците на нацистичките жртви се под зголемени напади од вандализам и закани.
Според Фондацијата Фридрих Еберт, истражувачки институт на левиот центар, податоците од анкетите покажуваат дека дури еден од 12 Германци сега поддржува некоја форма на крајнодесничарска идеологија. Ова е сериозно зголемување од многу пониските бројки забележани во претходните студии.
Како што објасни за Еуроњуз Франциска Шретер, истражувач во споменатата фондација, една од највпечатливите промени во последните неколку години е видливото ширење на екстремните верувања надвор од традиционалната германска генерациска поделба.
„Прифаќањето на екстремно десничарските ставови е видливо во секоја возрасна група, во зависност од кој феномен го набљудувате. Она што не загрижува е враќањето на трендот“, вели Шретер, додавајќи дека „некогаш, младите беа доследни демократите кои се залагаа за еднаквост наместо да бидат ревизионисти и националисти, додека постарите возрасни групи имаа повисоки стапки на екстремизам. Мислевме дека демографијата, глобализацијата и политичкото образование ќе помогнат, но сега гледаме поголема бројка меѓу средовечните луѓе, а особено младите“.
„Младите учесници во истражувањето кои главно не доживеале војна или вистинска закана од диктатура во нивните животи, но претрпеле многу кризи, се чини дека се наклонети кон идејата дека повеќе диктатура и помалку демократија би можеле да помогнат да се смират работите“, објасни Шретер, истакнувајќи дека е забележителен пресврт кај младите кон сексизам, хомофобија и трансфобија, позиции кои екстремната десница одамна ги прифати.
Подемот на десничарскиот екстремизам се чувствува во различни региони на Германија и во различни области од животот. Политичките кандидати на екстремната десница, особено оние кои ја претставуваат Алтернативата за Германија (АфД), имаат добри резултати на анкетите и постои сериозна загриженост околу радикализираните припадници на вооружените сили и полицијата.
Како и во многу други земји, пандемијата на Ковид-19 предизвика голем број Германци да се заинтересираат за радикални, расистички и понекогаш насилни теории на заговор, од кои некои се согласуваат дека земјата, па дури и светот, е преземена тајно од еврејски влијанија.
Алармот го вклучуваат и оние кои се задолжени за зачувување на споменикот на Холокаустот. Портпарол на Фондацијата за споменици и образовни центри во Хамбург што им оддаваат почит на жртвите на нацистичките злосторства, која е одговорна за Меморијалниот центар на концентрациониот логор Нојенгаме и неколку други меморијални локации, изјави за Еуроњуз дека персоналот во 2022 и 2023 година бележи зголемување на вандализмот, особено со налепници и графити со нацистичка тематика.
Г. Т.
