Новите рестриктивни мерки за кои Владата најави дека ќе почнат од 16 август, според кои во угостителски објекти ќе можат да влегуваат само лица со примена барем една доза вакцина, секојдневнотo зголемување на бројот на новозаразени со КОВИД 19, зголемување на бројот на заразени со делта сојот, како и потребата од сертификати за патување во странство, го зголеми интересот за вакцинација кај луѓето. Истовремено, се отворија низа нови прашања поврзани со тековната ситуација со Ковид-19 во земјата.
ЦИВИЛ МЕДИА денеска се обрати со неколку прашања до Министерството за здравство кое даде неколку одговори меѓу кои има и такви што, поради комплексноста на анализата, не можат веднаш да ги одговорат веднаш и во целост, како што наведоа во еден од одговорите. Во продолжение, ќе ги пренесеме нашите прашања и одговорите од Министерството за здравство.
КОМПЛЕКСНИ АНАЛИЗИ, ОДГОВОРИТЕ ТРЕБА ДА СЕ ПОЧЕКААТ
Дали постои евиденција колку лица кои прележале Ковид-19 се заразиле повторно? Колку од вакцинираните лица се заразиле со Ковид-19 и со какви симптоми, односно последици? Колку од починатите од Ковид-19 биле вакцинирани?
На овие прашања, Министерството за здравство одговори:
„Поради комплексноста на анализата во која се вклучени повеќе институции, а поради објективност кон јавноста, Министерството за здравство еднаш неделно, ќе објавува податоци за вакцинирани, за заразени или починати со ковид. Замолуваме за разбирање додека да се обработат податоците.“
ЕДНАКОВ ПРИСТАП
На прашањето дали прележаните од Ковид-19 што поседуваат и сертификат од МЗ ќе бидат третирани исто како и вакцинираните лица, Здравство одговори дека сертификат може да добие само лице кое е уредно вакцинирано со две дози од било која вакцина.
Во консултација со познавачи на состојбите, ЦИВИЛ МЕДИА дознава дека искуствата од други земји во Европа упатуваат на тоа дека и тие што го прележале Ковид-19 имаат имунитет и, со соодветен сертификат, имаат пристап до јавни објекти како и вакцинираните. Тоа секако треба да се земе предвид во спроведувањето на новите мерки за заштита од Ковид-19 и сегашниот сет мерки да се ревидира.
ВАРИЈАНТИ ОД КОВИД-19
Понатаму, Министерството за здравство информира дека во земјава се дијагностицирани 30 граѓани со присуство на делта варијантата на Ковид-19.
ЦИВИЛ МЕДИА го постави и прашањето: Кои варијанти на Ковид-19 се регистрирани кај нас и кои се статистиките? Дали вакцинираните лица се заразуваат со Делта, со Британскиот или со останатите варијанти од Ковид-19?
„Доминантен сој во нашата држава во моментов е британскиот, но со оглед на тоа што насекаде во регионот рапидно се шири делта варијантата на вирусот, не е исклучено да тој и кај нас стане доминантен сој во скоро време“ – одговорија од Министерство за здравство.
ЦИВИЛ МЕДИА Е НА РАСПОЛАГАЊЕ
Редакцијата им стои на располагање на граѓанките и граѓаните да поставуваат прашања или да известуваат во врска со теми и случаи што ги интересираат или ги засегнуваат. Прашањата и случаите ќе бидат доставени до релевантните институции, а заедно со прашањата и одговорите од институциите, тие ќе бидат објавени на медиумската платформа на ЦИВИЛ.
Д. Мишев
