ДРАГАН МИШЕВ
Дали повторно добивме партизирана, поточно вмроизирана Државната комисија за спречување на корупција, скратено ДКСК?
Секако, тоа би било во духот на традицијата на владеењето на ВМРО-ДПМНЕ, секогаш кога се на власт да имаме партизирани институции, зошто тогаш сегашнава гарнитура би била исклучок од воспоставената матрица.
Сето ова произлегува судејќи според активностите и брзината на реакција при одлучувањето по одредени предмети од страна на сегашното раководство на ДКСК. Така, иако во првите 100 дена од владеењето на ВМРО-ДПМНЕ и коалицијата речиси секојдневно по медиумите се објавувааа скандали во кои учествуваа членови на сегашната владејачка номенклатура, на ДКСК како најважен им се видел предметот во врска со патувањето на синот на премиерот Христијан Мицкоски на НАТО Самитот во Вашингтон, САД, кој го отвориле по сопствена иницијатива врз основа на објавени информации во медиумите, при што експресно донеле решение дека наводите објавени во јавност не се потврдуваат и нема елементи за натамошно постапување по оформениот предмет од причина што ДКСК по извршената проверка не утврдила прекршување на одредбите од Законот за спречување на корупцијата и судирот на интереси, односно не утврдила користење на буџетски средства за приватни цели.
Зарем некој се сомневаше во поинаков исход, кога целта и онака беше да се одработи пиаровски во корист на премиерот, да му се помогне сега кога секојдневно владејачката коалиција (на сите нивоа) ја тресат скандали.
Во меѓувреме, ДКСК не се изјасни ниту покрена постапка за серија сомнителни случаи за кои се зборува и пишува во јавноста. Останаа глуви и слепи на информациите за подарениот стан на Јанушев, за бугарските фирми на Максим и Јанушев, за летењето со бизнис класа и за скапите рачни часовници на Мицкоски, купени 2014/2015 и непријавени во тогашниот анкетен лист, за конфликтот на интереси при запослување и поставување блиски роднини на раководни функции, за екскурзиите на спикерот и неговото блиско опкружување. Не им падна во очи ниту отсуството на анкетен лист на нивната веб страна од советникот на претседателката, Жидас Даскаловски.
ДКСК како да дејствува на далечинска команда, како некој со притисок на копче да ги одбира предметите како канали на ТВ, со притискање на копчето од далечинскиот управувач (популарно наречен даљинско) се паузура, забрзува или стопира работата на Комисијата. Со далечинското може да се контролира и јачината на звукот, а кога е потребно, звукот може и целосно да се исклучи. И сите знаат во чии раце е далечинскиот управувач.
П. С. Прашањето од почетокот на текстот е реторичко.
Текстот е личен став на авторот.
