Користењето на канцелариски простор во државни институции за работни средби кои не се поврзани со надлежностите и работењето на институцијата, не е во согласност со принципите на Кодексот, велат од Државната комисија за спречување корупција (ДКСК) на прашањето на ЦИВИЛ – дали ќе преземат некакви мерки, односно како ќе го коментираат тоа дека министерката за финансии, Гордана Димитриеска-Кочоска, на својот Фејсбук профил се пофали дека во нејзиниот кабинет, во работно време, разговарале за локални избори и остварила конструктивна средба со Сотир Лукровски, кандидат за градоначалник на Општина Карпош, од ВМРО-ДПМНЕ.
„Во однос на Вашето прашање за ставот на Државната комисија за спречување на корупцијата за користењето на државните ресурси за партиски цели, Ве информираме дека со Кодексот за етичко однесување на членовите на Владата на Република Северна Македонија и носителите на јавни функции именувани од страна на Владата на РСМ е предвидено дека носителите на извршни функции во своето работење потребно е разумно да ги користат јавните ресурси и истите не смеат да ја искористат својата функција за стекнување на лична корист или корист на политичка партија“, велат од ДКСК.
Исто така, согласно членот 2-а од Кодексот, додаваат од Антикорупска комисија, Претседателот на Владата на РСМ го има назначено министерот за правда за следење на спроведувањето на Кодексот од страна на носителите на извршните функции.
„Истакнуваме дека со член 23 од Кодексот е уредено дека министерот за правда, покрај вербално и писмено укажување до функционерот, може да преземе активности и до претседателот на Владата на РСМ, да достави мислење за постапувањето на одреден функционер, кој понатаму може да побара и политичка одговорност од истиот односно барање за поднесување на оставка или предлог за негово разрешување“, велат за ЦИВИЛ од Државна комисија за спречување на корупцијата.
Фотографијата од средбата за „локалните избори“ со партиски кандидат на ВМРО-ДПМНЕ, министерката Димитриеска-Кочоска ја објави на Фејсбук во работно време во 11:42 часот, на 6 август 2025.
„Пријателска и конструктивна средба со Сотир Лукровски, кандидат за градоначалник на Општина Карпош, и пратеникот Тони Јаревски. Разговаравме за претстојните локални избори и за важноста на визијата и одговорниот пристап во управувањето со општините. Карпош заслужува нова енергија посветена на граѓаните, чесна и ефикасна локална власт“, објави министеркатаза финансии.
ЦМДТ
