Неказнивоста на криминалот и на криминалците во Македонија е мит, најлични мои! Да, да, мит, создаден од мрачните сили, Бранко, Сорос, „длабоката држава“ на ЦИА и Хилари Клинтон, масоните, Евреите и ИСИС (здружено), НАТО и вавилонската ЕУ!
Да не се лажеме, таа голема лага има една и единствена цел: да ја уништи нашата библиска земја, една од најправедните земји на светот! Башка тоа што сме меѓу најнапредните и најбрзорастечките економии, земја без корупција, која што така упорно низ Дуњава ја бараше и ја најде познатиот светски трагач по држави ослободени од рушветот и митото, Субрата Рој!
А, докази дека цел свет лаже за неказнивоста кај нас, и дека во Македонија суверено владее правото, правдата и домаќинлакот на долгата рака на нашата мајчица партија, има илјадници на број!
Па, до Бога, малку ли ви беа Душко Млекарот, Велија Рамковски и неговото семејство и соработници, Љубе Бошкоски, Ване Цветанов, Томислав Кежароски, Зоран Божиновски, жените што ги апсеа за случајот „Монструм“, оние што лежеа со години за „Сопот“, демонстрантите од 6 мај 2015-та, или пак, оние што ја кршеа празната канцеларија на Иванов лани, а кои сè уште се влечкаат по судови…?
Малку ли се илјадниците блокирани сметки и затворени фирми, малку ли ви се извршителите, присилните наплати, малку ли ви е плачењето и кукањето по шалтери…, за да видите дека нема шега со нашата правна држава?
Е, сега, треба да имате разбирање и за нашите преполни затворски капацитети, преполни фиоки по судовите со нерешени предмети, преполни канцеларии во институциите со партиски војници…
Правдата е бавна, но сепак, пристига. Затоа, во последно време (а и пред тоа), мораме да избираме како и кого ќе казнуваме и, како што можете да забележите, сè повеќе употребуваме алтернативни и воспитни мерки, особено кон оние кои што се заслужни за нашето успешно владеење!
Затоа, оние кои се обидоа да убијат луѓе во Собранието на 27 април, добија условна казна. Да крадеа ќебапчиња, друго ќе беше!
Затоа, оние кои украдоа милијарди евра од граѓаните и ја продаваа државата, парче по парче, концесија по концесија, за џабе, сè уште се на слобода. Да продаваа марули, друго ќе беше…
Затоа, оние што затајуваа данок и од ваши пари градеа милионски викендички со базени, купуваа душеци од илјадници евра или секси долна облека од 500 евра, не само што не се кријат, туку уште позасилено трујат со пропаганда на телевизија, во весници, на Интернет… Да украдеа некоја тегла ајвар, друго ќе беше…
Затоа, оние што возат лудачки и газат и убиваат луѓе на пешачки премини и по тротоари, ги гледате сербез седнати по скопските кафеани, или во Собранието на испомош на нашите тврдокорни поддржувачи. Затоа, вие плаќате казни за погрешно паркирање, за појас, за штопот што не ви работи оти немате пари да го замените, затоа вашите автомобили стари по 15-20 години ги креваат „пајаци“. Да возевте џипови и бесни мотори, друго ќе беше…
Така да си знаете, и да не ми се жалите повеќе! Наместо тоа, земете си една качулка, натнете ја на глава, излезете на улица, истепајте некој, почувствувајте ја правдата и слободата, додека ги имаме. Оти, за некој ден, друго ќе биде!