Освен зголемениот дефицит во Буџетот, државата од месецов ќе биде позадолжена за дополнителни педесетина милиони евра кои ќе бидат обезбедени преку издавање на државна обврзница.
Обврзницата, ја издало Министерството за финансии на 11 јули, а рокот за доспевање е 11 јули 2039 година и 15 години, се наведува во анализата од Соња Танеска, во која се осврнува на жешката тема околу Ребалансот на буџетот, но уште повеќе и околу задолжувањето од Унгарија, што како прв приоритет и на голема врата го најави новиот премиер на владата, Христијан Мицкоски.
Ребалансот беше усвоен на владина седница во вторникот, а во средата на прес-конференција во Владата го образложи министерката за финансии Гордана Димитриевска-Кочовска, главна карактеристика е зголемениот дефицит, повеќе пари за пензионерите и општините, се крати од здравство и студентите.
Во четврток ребалансот на Буџетот ќе се најде на дневен ред на собраниската Комисија за финансирање и буџет, а треба да биде усвоен најдоцна до првата недела од август. Според информациите од веб страницата на Собранието, седницата на Комисијата е закажана во 11 часот.
Понатаму во анализата, Танеска посочува на растот на БДП, кој е ревидиран од првично планираниот, со проекција на инфлацијата.
Растот на БДП е ревидиран од првично планираниот 3,4 проценти на 2,1 проценти, а инфлацијата е проектирана на ниво од 3,5 проценти. Во втората половина на годината се очекува забавување на растот на инфлацијата, односно стабилизирање на цените на храната и енергенсите, како и поумерен притисок од базичната инфлација.
Вкупните приходи се планирани на ниво од 318 милијарди 150 милиони денари и бележат зголемување за 8 милијарди и 22 милиони денари, додека расходите се проектирани на ниво од 362 милијарди 816 милиони денари, односно на расходна страна има зголемување од 19 милијарди 178 милиони денари. Повеќе пари за пензионерите и општините, се крати од здравство и студентите.
Д. Т.
