Светскиот ден на детето, 20 ноември, треба да ги потсети сите дека во светот сè уште постојат деца кои живеат во многу лоши услови, кои имаат влијание врз нивниот раст и развој во животот. Овој ден треба да потсети за грижата на децата што живеат во сиромаштија, без родители или се жртви на семејно и друг вид на насилство.
На 20 ноември 1959 година, Генералното собрание на ОН ја усвои Декларацијата за правата на детето и на 20 ноември 1989 година ја усвои и Конвенцијата за правата на детето.
Од 1990 година, како универзален ден на детето се одбележува денот кога Генералното собрание на ОН ги усвои Конвенцијата за правата на децата и Декларацијата за правата на детето.
Иџет Мемети, Народниот правобранител на Македонија по повод Светскиот ден на детето истакна дека од круцијално прашање е да се создадат услови за соживот, почитување на различностите и општество во кое секое дете ќе знае дека дијалогот, а не насилството е одговор за решавање на проблемите.
„Свесни сме дека за да има хармоничен развој на личноста на секое дете, треба да создадеме услови тоа да расте во здрава семејна средина, во пријатна атмосфера исполнета со среќа, љубов и разбирање. Токму тоа не задолжува децата да ги третираме како рамноправни на нас возрасните, како активни субјекти и носители на права и обврски“, стои во соопштението на омбудсманот.
Детскиот фонд на ОН (УНИЦЕФ) соопшти дек денеска децата ширум светот ќе се појават во медиумите, политиката, бизнисот, спортот и забавата, за да укажат на најголемите проблеми со кои се соочуваат.
Биљана Јордановска
