Изборната кампања за локалните избори што ќе се одржат на 15 октомври, зема замав. Политичарите водат силна битка. Секој град, секое населено место, маало, улица…, се политичка арена, каде политичарите се мечуваат со проекти и ветувања, реални и тешко остварливи.
Сè уште во духот на демократијата, но и со вокабулар полн со пораки што шират омраза, исполнет е говорот на лидерот на ВМРО-ДПМНЕ, Никола Груевски. Во интервалите од судските рочишта за обвиненија од СЈО, во предметите што произлегоа од аферата „Прислушување“, Груевски вложува максимални напори, (зашто, сè уште е без пасош) да ја продолжи битката, за да си ја спаси „кожичката“.
Користејќи ги познатите флоскули, прашувајќи дали СДСМ и Заев се „свесни дека тргуваат со народните интереси?“, тој повторно се обиде емотивно да допре до гласачите од Карпош.
„Исто така, во нивните говори има непромислени работи како, дека тие ќе донеле живот, а веќе видовме што живот донесоа овие четири месеци и ако некој им веруваше пред 11 декември, сега веќе многу малку има, животот не можат да дадат, тие, бидејќи животот го дава Господ и не треба да се прават Господ, бидејќи Господ го одредува тоа. На 15 октомври ќе видат што е масовно и достоинствено гласање, за ‘Новата ера’“, рече демохристијанинот Груевски, повикувајќи се на Бога.
Но, сигурно има краткотрајна меморија, зашто многу брзо заборавил што правеше со парите од најсиромашните граѓани во државава, на кои што им ја кратеше социјалната помош на сите начини, па и за добиени минимални 500 денари награда од „Храна и вино“, домаќинките остануваа без надомест. Тој пак, со нивните пари, хедонистички и бесрамно си ги купи своите брендирани „сан глесис“ од 60.000 евра. И сето тоа, како прононсиран демохристијанин,веројатно, во името на Господ.
Неговиот ривал Зоран Заев, (ко ги експонираше чувствата за Дојран оти оттаму му била првата љубов, без да знае дали тоа можеби не е случај и со Груевски), во битката за задржување на власта ја побара поддршката и на граѓаните од Берово. Оттаму, на јавноста многу храбро ѝнајави: „Секој граѓанин, со каков предизвик и да се соочи, градоначалникот, Општината, ако треба цела држава, ќе застане зад него да помогне“! Ветување за почит, остварување…, според досегашното искуство, ќе треба и помош од божја страна.
Коце Трајановски пак, вети дека ќе го подобрува сообраќајот на Скопје и тоа со проширување на „Пластичарската“, улица која не е тесна, туку ја претрчува кој кога и како сака… Кој знае, покрај боењето на кутрото Скопје во зелено, може и така ќе дојде до глас повеќе.
А, Петре Шилегов, ја претпочита зелената боја, и ќе ја почитувал волјата на граѓаните за изгледот на ГТЦ и ќе го оставел отворен за сите, ама „ќе направел зелен покрив на ГТЦ“, оти со „чист воздух“ – СДСМ ќе го носел животот во Скопје.
Левица најави сериозни заложби против урбанизација на реката Вардар и ќе го враќа првичниот изглед на реката?!
Додека реформистите на ВМРО-ДПМНЕ решија да ги остават своите сопартијци сами да одлучат дали воопшто и за кого ќе гласаат, беровскиот Општински комитет на ВМРО-НП му изрази поддршка на кандидатот од СДСМ, Звонко Пекевски и на целата советничка листа на СДСМ.
Демократската унија за интеграција на митинг во Студеничани им вети поддршка на постоечките бизниси, и отворање нови работни места, при презентацијата на програмата на кандидатот за градоначалник, Феми Јонузи, а кандидатот за градоначалник на Општина Тетово од ДПА, Биљал Даути на тетовчани им укажа на уште едно неисполнето ветување од досегашната градоначалничка, Теута Арифи, која ветуваше и изградба на ново основно училиште во една приградска населба, ама не го изгради.
Ветувања, планови, проекти, пари, нови вработувања… Кампањата продолжува, засега, во мирна и демократска атмосфера.
Моника Талеска
