Демонстрантите ширум Франција денеска ги блокираа железничките пруги и автопатиштата и се судрија со полицијата во неколку градови во знак на протест против претседателот Емануел Макрон и неговите длабоко непопуларни пензиски реформи.
Околу 13.000 полицајци се распоредени на улиците низ Франција на десеттиот ден од протестите поради пензиската реформа на Макрон. Париската полиција соопшти дека досега во главниот град на Франција се уапсени 22 лица. Синдикатите го повикуваат Макрон и бараат од него да се откаже од зголемувањето на законската старосна граница за пензионирање од 62 на 64 години.
Речиси 93.000 луѓе учествуваа на денешните протести во Париз, соопшти париската полиција. Оттаму додаваат дека до 18 часот биле уапсени 23 лица.
Претходно, еден од главните синдикати во земјата објави дека речиси половина милион луѓе присуствувале на протестите. Бројките од полицијата и синдикатите често се спротивставени кога станува збор за протести.
Сообраќајот во градот Рен бил запрен. На снимките од социјалните мрежи се гледа густ, црн чад кој се извива над обиколницата, а ѓубрето кое гореше предизвика голем сообраќаен метеж.
Des feux ont été allumés sur la rocade ouest de #Rennes#greve28mars#ReformeDesRetraites pic.twitter.com/iCB1hX53gF
— Ewen Bazin (@EwenBazin) March 28, 2023
Штрајкот на синдикатите кои се против владините пензиски реформи во нафтените рафинерии во Франција трае веќе трета недела, а магацините за гориво исто така се блокирани.
Производството прекина во две најголеми француски рафинерии и ги принуди други три да работат со намален капацитет. Останатите две во моментов се затворени поради поправки.
Ова значи дека околу 17% од сите бензински пумпи низ целата земја сега се без барем еден производ, соопшти Француската нафтена асоцијација (UFIP).
Бретања и Нормандија на север и голем дел од областа околу брегот на Средоземното Море се особено тешко погодени од недостигот.
Штрајковите во транспортниот, авиопревозот и енергетскиот сектор продолжуваат да го отежнуваат патувањето. Студентскиот синдикат УНЕФ соопшти дека влезовите на 20 универзитети, вклучувајќи го Сајенс По (Sciences Po) и делови од Сорбона во Париз, се блокирани.
На протестите во Марсеј и во другите градови имаше уште помалку демонстранти од претходно. Шарл де Курсон, од опозициската партија Лиот, изјави дека француските власти треба да извлечат поука од ситуацијата во Израел, каде владата под притисок на јавноста ја стопира контроверзната судска реформа.
Утрово протестите почнаа мирно во повеќе градови, но подоцна дојде до судири.
Во западниот град Нант, опожарен е влезот на филијалата на банката БНП Парнибас. Запален е и еден автомобил, а некои луѓе фрлале пиротехнички средства кон полицајците.
Même que ça crame à Commerce #Nantes #greve28mars #ReformeDesRetaites pic.twitter.com/YPTuMPeT1L
— ⚔️ (@MarionLpz) March 28, 2023
Ние предложивме решение… и не може да се толерира повторно да бидеме одбиени, изјави пред новинарите лидерот на синдикатот CFDT Лоран Бергер на почетокот на протестот во Париз.
Претседателот Макрон тврди дека се потребни реформи за да се балансираат државните финансии. Синдикатите и опозицијата сметаат дека постојат и други решенија.
Милиони луѓе протестираат и штрајкуваат од средината на јануари против оваа реформа. Но, фрустрацијата на јавноста се претвори во поширок протест против Макрон.
Протестите се интензивираа откако владата со декрет ја наметна пензиската реформа, заобиколувајќи го Парламентот. Во четвртокот, последниот ден од големите протести, анархистите од групата Црн блок искршија излози на продавници, автобуски постојки и уништија ресторан на Мекдоналдс во Париз, а слично насилство имало и во другите градови.
Станува збор за едно од најлошите улични насилство во земјата во изминатите години, што потсетува на протестите на Жолтите елеци за време на првиот мандат на Макрон.
Г. Т.