Стечајните работници од АД ЕМО од Охрид бараат да бидат опфатени со новиот закон за обештетување на стечајците.
Во април 2017 е отворена постапка за над 50 стечајци со поднесени побарувања за неисплатени плати и придонеси. ЕМО замина во стечај на 31 декември 2016 година, а работниците, преку Центарот за вработување, добиваат надоместок во зависност од основите за пензионирање.
Стечајците од ЕМО бараат Владата да изврши надополнување на Предлог – законот за материјално обезбедување на невработени лица поради приватизација на претпријатија со доминантна сопственост на државата, со поместување на датумот – до мај 2017.
Во 2015 година, како дел од иницијативата „Социјална правда, сега“, ЦИВИЛ Центар за слобода разговараше со синдикалец од АД ЕМО што сакаше да остане анонимен, за условите за живот и за работничките права. Соговорникот, огорчен од условите за работа, изјави дека работниците се „робови на 21 век“ без никакви права.
Во истиот период, како дел од иницијативата, Иван Николовски, претседател на Здружението на стечајни работници од Охрид, Струга и Ресен, изјави за ЦИВИЛ Медиа, дека по затворањето на фабриките како „Езерка“, „Застава“, „Отекс“, „Братство“ и многу други во овој регион, стечајците со 25 години стаж и нерегулиран статус, самите мора да се снаоѓаат.
Со законот за стечајци се опфатени 3.000 граѓанки и граѓани, а претседателката на Здружението УНИТ, Лилјана Георгиева, за ЦИВИЛ Медиа, изјави дека никој не е заборавен и дека борбата за стечајните работници продолжува, сè додека сите не бидат опфатени со овој закон.
Биљана Јордановска