Во својот последен потег, Доналд Трамп воведе нови царини за многу земји, меѓу кои и за долгогодишните партнери и сојузници,вклучително и Украина – но не и Русија и Белорусија, , пишува Драган Мишев во колумната „Тарифите на Трамп: Реакции, неизвесност и скриената агенда“.
Трамп воведе царини од 33 отсто за производи од Македонија. Аналитичарите предупредуваат – малите економии како македонската се најранливи кога трговските војни стануваат глобални.
Од Владата излегоа со соопштение дистрибуирано попладне, некаде по 14 часот, што го довeдува во прашање тврдењето дека владините тимови веќе некое време ги анализирале можните последици и имале подготвен план за надминување на ситуацијата. Оваа одлука нема да има голем импакт врз нашата економија, но ние имаме јасен план како понатаму.
Од Илинденска велат дека контактите со американската администрација се веќе воспоставени и ќе продолжат на високо ниво, а Владата ќе работи на изнаоѓање решение и на спроведување на планот. И со ова секако се побиваат претходните тврдења дека контакти на (нај)високо ниво беа воспоставени за време на неколкутe посети на Мицкоски и владината тајфа на Вашингтон, со кои Северна Македонија застанала „во првите редови“ пред новата администрација на Трамп.
Во реакцијата на премиерот Христијан Мицкоски, која пристигна доцна вечерта, тој се обиде да го дезавуира прашањето на царините изјавувајќи дека ниту една земја во Европа не била подготвена за тоа и никој не се подготвувал претходно, што е дијаметрално спротивно на соопштението од Владата, чиј премиер е самиот Мицкоски, дека владините тимови веќе некое време ги анализирале можните последици и имале подготвен план за надминување на ситуацијата.
Дополнително, во обид да го оправда Трамп, Мицкоски изјави дека и во нашиот царински тарифник за некои групи на производи имаме царини повисоки од 60 проценти и притоа изрази надеж дека, според негов предлог, ќе успее да потпише договор за слободна трговија со САД, отвaрајќи си простор за ново, ако судиме според досегашните, непродуктивно патување во Вашингтон.
П. С. Измешаниот редослед на зборовите во насловот не е резултат на дислексија, само ја доловува какафонијата и дезориентираноста што владее во државниот врв.
Текстот е личен став на авторот
ПРОЧИТАЈТЕ И:
Ин а УГУРАција: Од каде и во какво друштво Мицкоски ја следеше инаугурацијата на Трамп
