Откако Кривичниот суд не ги прифати барањата на Специјалното јавно обвинителство за притвор на петте обвинети лица опфатени со предметите „Тврдина“ и „Таргет“, денеска се очекува да одлучи и за побараните мерки притвор во првиот предмет на СЈО, „Титаник“.
Во февруари минатата година, кога СЈО го покрена случајот „Титаник“ што се однесува на изборна измама направена од високи функционери од претходната власт, Обвинителството поднесе барање за мерка притвор за осум лица кои се осомничени за криминализација на изборниот процес за опстојување на власт, а истрагата е отворена за злосторничко здружување, повреда на избирачко право и на слобода на избирачите, поткуп при избори и гласање, уништување на избирачки материјали и злоупотреба на средства од изборна кампања.
Обвинителката Фатиме Фетаи соопшти дека осомничените во 2012 година, „во својство на министер за внатрешни работи, министер за транспорт и врски, секретар на Влада, и со помош на засега непознати лица, за натамошно останување на власт на партијата на локално и државно ниво, направиле кривични дела за кои казните се три години затвор и повеќе“.
Според обвинителката Фетаи, МВР направило упад во Избирачкиот список, а дел од изборните кражби, биле и операции на МВР, кое издало 15.000 нови матични броеви, 35.000 нови лични карти и 60.000 нови македонски државјанства!
На изборите во 2013 година гласале лица и со возачки дозволи, дијаспората била злоупотребувана, а нотари подготвувале нелегални договори за живеалишта врз чија основа се набавувале лажни лични документи.
Како осомничени во операцијата „Титаник“, истиот месец на распит во Кривичниот суд беа повикани поранешните министри Гордана Јанкулоска и Миле Јанакиески, екс-секретарот на владата Кирил Божиновски и градоначалникот на Пустец, Едмонд Темелко.
ТВ Алсат ја пренесе изјавата од Брисел дека Европската комисија не сака да коментира судски процеси кои се во тек, но дека силно ја поддржува работата на Специјалното обвинителство.
СЈО доби силна поддршка од граѓанките и граѓаните, од низа организации на граѓанското општество, како и од меѓународната заедница. На Фејсбук се појави и фан-страница на обвинителката Фатиме Фетаи која за кратко време собра околу 3.000 лајкови.
Веднаш по прес конференцијата на СЈО, ЦИВИЛ – Центар за слобода излезе со соопштение за поддршка на професионалноста и храброста на тимот на Катица Јанева.
Една година подоцна, Јанкулоска, беше повикана во СЈО да даде исказ, во својство на осомничено лице за случајот „Титаник“. Нејзините правни застапници побараа увид во доказите за истрагата.
Досега Кривичниот суд ги одби сите барања за притвор на СЈО, но одлучи да им се одземат пасошите на 29 обвинети, а против вкупно 35 лица се определени мерки за претпазливост.
