Categories

МЕМОРАНДУМ Инклузива и ДИК со заеднички придонес за гласачките права на лицата со попреченост

Здружението за промоција и развој на инклузивно општество „Инклузива“ и Државната изборна комисија, потпишаа Меморандум за соработка.

Меморандумот е изготвен во согласност со европското законодавство, Конвенцијата на Обединетите Нации за правата на лицата со попреченост, домашната регулатива и интерните акти.

Претседателката на „Инклузива“, Благица Димитровска, на почетокот на своето обраќање им се заблагодари на медиумите, како главни сојузници во истражувањето и препораките на организацијата за учество на лицата со попреченост во изборниот процес уште во 2016 година.

Димитровска, исто така, го објасни процесот на делување и соработка со Државната изборна комисија што доведува до моментот на официјализирање на соработката меѓу „Инклузива“ и ДИК.

„Во пресрет на локалните избори 2017, повторно направивме мало истражување, во соработка со ЦИВИЛ. Во рамки на нивните набљудувачи имавме свои набљудувачи на терен. Сите забелешки се однесуваа во однос на организирање и спроведување на изборите. Ќе се обидеме за следните избори сите препреки да бидат отстранети“, изјави Димитровска.

 

Таа изрази надеж дека обуките на изборната администрација во ДИК ќе придонесе за подобра комуникација со лицата со попреченост. Како следни чекори во однос на едукацијата се обуките на членовите на Општинските изборни комисии.

„Со денешното потпишување на овој Меморандум за соработка започнува период на плодна соработка помеѓу нашите две организации. Денеска заемно се согласивме координирано да работиме во насока на остварување на конкретни цели, зголемување  на учеството на лицата со попреченост во изборниот процес, преку усогласување на подзаконските акти со одредбите од Конвенцијата на ОН за правото на учество на лицата со попреченост во изборниот процес, подобрување на ефикасноста и ефективноста на процесот на организирање и спроведување на избори и процесот на гласање во однос на лицата со попреченост,  зголемување на свесноста и знаењата за изборниот процес на граѓаните со попреченост, како и подготовка на изборната администрација за поддршка и комуникација со лица со попреченост“, изјави Добре Јанчев, генерален секретар на ДИК.

Одговарајќи на новинарско прашање, Димитровска, ја потенцираше потребата од регистар со број на лица со попреченост. Таа нагласи дека во североисточниот регион на Македонија, има околу 1000 лица со попреченост, со кои здружението е во постојан контакт, но тоа не е реалната бројка, односно потребна е помош од институциите за да се добие јасна слика за колкава е бројката на овие граѓани.

„Дополнително отежнува што, како гласачко тело, лицата со попреченост се наоѓаат во категоријата стари и болни, изнемоштени, лица. Една од препораките на „Инклузива“, е лицата со попреченост да се одвојат како посебна категорија на гласачи“ , изјави Димитровска.

По потпишувањето на Меморандумот, „Инклузива“, продолжи со обука на Стручната служба на ДИК, преку која учесниците ќе се стекнат со вештини за испорачување на обуки за лица со попреченост.

По комплетирањето на оваа активност, ќе следат регионални работилници за претставници од општинските изборни комисии, кои ќе се реализираат во текот на месеците април и мај оваа година.

Со реализацијата на овие активности се очекува ДИК да се стекне со тим на обучувачи со специфични вештини за комуникација и испорачување обуки на лица со попреченост. Овој тим на обучувачи понатаму ќе работи на реализација на целите на Меморандумот за соработка.

Биљана Јордановска

 

Print Friendly, PDF & Email