„Колку повеќе непријатели, толку поголема е честа“, е одговорот на германската амбасадорка во Македонија, Кристине Алтхаузер, откако синоќа, претседателот Ѓорге Иванов ја обвини дека пренесува лажни информации!? Германското МНР излезе со став дека обвинувањата на Иванов се – неумесни!
„Германија е добар пријател на Македонија. Лично, имам добра соработка и со претседателот и со сите политичари во земјава. Мојата овдешна работа е високо почитувана во мојата родна Германија и од министерот за надворешни работи, и од канцеларката и јас сум во секојдневен контакт со властите во мојата земја“, појасни Алтхаузер.
Со реакција по обвинувањата на Иванов, се јави и германското Министерство за надворешни работи. Оттаму велат: „Се радуваме што претседателот Иванов, по долго размислување, дојде до вистинска одлука и се откажа од ставот на блокирање. Обвинувањата упатени кон германски дипломати и други пријателски држави се неумесни. Како што е познато, проценките кои ѝ се пренесуваат на земјата-домаќин, секогаш се договараат во тесна координација меѓу Министерството за надворешни работи и Амбасадата“.
Синоќа во разговор за ТВ Нова, Иванов изјави: „Такво соопштение да даде германското МНР, кажува дека нивниот амбасадор тука се служи со лажни вести. И не е првпат. И за бегалската криза имавме иста ситуација, па канцеларката Меркел мораше јавно да се извинува во Брисел. Како порано да се даде мандатот? Да го кршам Уставот?“.
Недипломатските обвинувања на Иванов доаѓаат по соопштението на германското МНР дека „е добро што претседателот Иванов попушти и престана да го блокира формирањето на новата влада, но оваа одлука требаше одамна да се случи, и конечно го рефлектира исходот од изборите во декември 2016 во земјата“.
М.Т.
