Претседателски избори
Очекувањата се дека претстојните избори ќе бидат фер и демократски без никакви притисоци и покрај вчерашната тензија меѓу претседателските кандидати на потпишувањето на Кодексот за фер и демократски избори, изјави денеска претседателот на Државната изборна комисија, Александар Даштевски, по завршувањето на средбата на претседателите на подмладоците на политичките партии кои потпишаа Декларација за фер, слободни и демократски избори.
– Сметам дека вчерашниот настан за потпишување на Кодексот имаше тензии, меѓутоа не верувам дека ќе продолжи во таа атмосфера, затоа што главно сите услови се исполнети. Од наша страна, односно техничките услови ги преземаме согласно со законот и во согласност на етиката и моралот на сите учесници. Сметам дека ќе биде уште подобро, затоа што сметам дека ќе поминат овие детски болести на напаѓања и нефер кампања и ќе се фокусираат партиите на изборната кампања, односно претставување на програмите, откако ќе почне кампањата, рече Даштевски.
Во преполна сала „Борис Трајковски“ вчера се одржа конвенцијата на петседателскиот кандидат и актуелен шеф на државата Стево Пендаровски. Доаѓањето на Пендаровски беше најавено и бурно поздравено со тапани, а поддршка за кандидатурата му дадоа познати глумци и јавни личности, кои ги истакнуваа скромноста, чесноста и отвореноста за сите граѓани како негови карактеристики додека беше досега на функцијата.
Во своето обраќање Пендаровски упати критики кон опозицијата за нивното владеење претходно, и кажа дека ќе продолжи да биде жесток критичар на криминалот и корупцијата.
Парламентарни избори
До Државната изборна комисија, заклучно со 2 април на полноќ, се пристигнати вкупно 17 листи на кандидати за пратеници за парламентарните избори кои ќе се одржат на 8 мај годинава.
Како што соопштија од ДИК, листи на кандидати за пратеници за парламентарните избори во мај доставиле:
1.СДСМ( Kоалиција за европска иднина) – за ИЕ1, ИЕ2, ИЕ3, ИЕ4, ИЕ5, ИЕ6 / 2.ВМРО- ДПМНЕ ( Коалиција Твоја Македонија) – за ИЕ1, ИЕ2, ИЕ3, ИЕ4, ИЕ5, ИЕ6 / 3. ЗНАМ – за ИЕ1, ИЕ2, ИЕ3, ИЕ4, ИЕ5, ИЕ6 / 4.РОДИНА – за ИЕ1, ИЕ2, ИЕ3, ИЕ4, ИЕ5, ИЕ6 / 5.АВАЈА – за ИЕ 3, ИЕ4, ИЕ5, ИЕ6 / 6.РАБОТНИЧКА ПАРТИЈА – за ИЕ1, ИЕ2, ИЕ3, ИЕ4, ИЕ5, ИЕ6 / 7.ТВОЈА ПАРТИЈА – за ИЕ1, ИЕ2, ИЕ3, ИЕ4 / 8.ГРОМ – за ИЕ1, ИЕ2, ИЕ3, ИЕ4, ИЕ5, ИЕ6 / 9.МАКЕДОНСКА ЕРА ТРЕТА СУВЕРЕНОСТ – за ИЕ1, ИЕ2, ИЕ3, ИЕ4, ИЕ5, ИЕ6 / 10. ДУИ ( Коалиција за европски фронт) за ИЕ1, ИЕ2, ИЕ3, ИЕ4, ИЕ5, ИЕ6 / 11.ДЕМОКРАТИ – за ИЕ1, ИЕ2, ИЕ3, ИЕ4, ИЕ5, ИЕ6 / 12.ЕДИНСТВЕНА МАКЕДОНИЈА – за ИЕ1, ИЕ2, ИЕ3, ИЕ4, ИЕ5, ИЕ6 / 13.Група избирачи ЏУЛА ЧЕЛИКУ- за ИЕ 6 / 14.Коалиција ВЛЕН – за ИЕ1, ИЕ2, ИЕ3, ИЕ4, ИЕ5, ИЕ6. / 15. ЛЕВИЦА – за ИЕ1, ИЕ2, ИЕ3, ИЕ4, ИЕ5, ИЕ6 / 16. ДЕСНА – за ИЕ1, ИЕ2, ИЕ3, ИЕ4, ИЕ5, ИЕ6 / 17.НОВА АЛТЕРНАТИВА – за ИЕ 1,ИЕ 2, ИЕ3, ИЕ4.
ДИК по приемот на листата на кандидати утврдува дали истата е поднесена во утврдениот рок и составена во согласност со одредбите на Изборниот закон.
Европскиот фронт синоќа до Државната изборна комисија (ДИК) ги достави листите со носители и сите 120 кандидати за пратеници во шесте изборни единици на Фронтот „Да на Европа, не на Русија“. На изборите на 24 април и 8 мај, Европскиот фронт ќе се натпреварува за секој глас на секој граѓанин, без разлика на етничката припадност. Силно веруваме дека Европскиот фронт со нашите кандидати ќе ја постигне следната победа – плус 20 пратеници, истакна денеска во изјава за медиуми Арбер Адеми.
Европскиот фронт, нагласи Адеми, силно ја поддржа Програмата и заедничката кауза – најбрза можна интеграција на Северна Македонија во Европската Унија и спречување на руските политики и влијанија во земјата и пошироко.
Подготви: Н. Абдурахмани во соработка со ЦМТ
