ЦИВИЛ – Центар за слобода организира промоција на публикацијата ИЗБОРИ 2016: Меѓу стравот, поделбите и заробената држава (Финален извештај за долгорочното набљудување на политичкиот процес и предвремените парламентарни избори во Република Македонија). Промоцијата ќе се одржи в четврток, 2 февруари, со почеток во 12:30 часот во хотел Парк Ресиденс, Скопје.
Промоцијата ќе ја отвори Н.Е. д-р Кристине Д. Алтхаузер, амбасадорка на Сојузна Република Германија.
Овој настан е заокружување на проектот „НАПРЕД!“ поддржан со германски средства при Пактот за стабилност на Југоисточна Европа, спроведен во периодот од 1-ви јануари 2016 до 31-ви јануари 2017 година.
Проектниот тим на ЦИВИЛ подготви сеопфатен извештај и анализа на овие процеси, со цел да послужи како документ кој ќе придонесе за надминување на недостатоците во изборниот систем и за спроведување на изборните процеси во земјата, а ќе има и значителен придонес во решавањето на политичката криза.
Публикацијата, како една од предвидените активности на проектот, содржи извештаи од терен и анализи на нашите наоди. Како документ, оваа публикација, исто така, ќе послужи како важна препорака и извор на информации за граѓанското општество, политичките партии и меѓународната заедница во рамките на напорите за создавање на услови за слободни избори и во иднина.
