Ниту едно од обвиненијата на Специјалното јавно обвинителство сѐ уште не е правосилно, зашто жалбените рокови ја одложија оценката на судиите. Седумнаесетте обвиненија кои СЈО пред речиси еден месец ги поднесе против 94 лица, сѐ уште не се правосилни, обвинителните акти не се оценети, ниту пак, за нив има закажан датум за старт на судски процес. Постапката за правосилност на обвиненијата поднесени од СЈО, не е завршена, бидејќи течат роковите за жалби за мерките за обезбедување на присуство, кои обвинителите од СЈО ги бараат за обвинетите.
35 јавни седници досега се одржани во Апелацискиот суд Скопје, откако одлуките на Кривичниот совет при Основниот суд Скопје 1 ги обжалија и Специјалното јавно обвинителство и одбраната. Откако ќе завршат сите жалбените постапки, судиите кои веќе беа назначени да одлучуваат за оценка на обвиненијата, ќе постапуваат, по што, доколку обвиненијата бидат позитивно оценети, ќе биде закажан и датум за старт на судење за кој јавноста ќе биде известена.
На 29 јуни, Специјалното јавно обвинителство поднесе 17 обвиненија за 18 предмети, во кои осомничени се 94 лица. Специјалните обвинители побараа притвор за 18 лица, меѓу кои и за првите луѓе на ВМРО-ДПМНЕ, Никола Груевски, Сашо Мијалков, Гордана Јанкуловска, Миле Јанакиески…, а за останатите побарани беа мерки на претпазливост.
Денеска во Апелацискиот суд беа одржани последните три закажани седници за жалбите на одлуките на Кривичниот совет. Апелацискиот суд има рок од 48 часа да донесе одлука за случајот „Тендери“, а Врховен има 48 часа да одлучи за жалбите поденсени за трите претходно определените притвори.
Но, наместо притвор, првостепениот суд и го одзеде пасошот на поранешната министерка за култура Елизабета Канческа-Милевска која е обвинета за злоупотреба на службената положба во овој случај. Таа се жали и на таквата определените мерки. СЈО пак, смета дека треба да се определи притвор, со цел – непречено водење на постапката. Одбрана тврди дека СЈО не укажало на ниту една изменета околност откако првостепениот суд одлучувал и се определи за за одземање на патната исправа. Адвокатот Сашо Дуковски, дури рекол: „Замислете, министерка без пасош“!
Канческа-Милевска е обвинета во случајот „Тендери“, поврзан со местење тендери за изведување градежни работи во Музејот на ВМРО, кој е дел од проектот „Скопје 2014“. Според тоа што го презентираше СЈО, со малверзациите државната каса била оштетена за повеќе од 50 милиони денари. Покрај поранешната министерка, обвинети се уште две лица, за едното, исто така, се бара притвор, а за другото – мерки на претпазливост.
Кривичниот совет при Основниот суд Скопје 1 ги одби сите барања на СЈО за определување на притвор и определи мерки на претпазливост за обвинетите, односно им ги одзеде патните исправи и ги задолжи редовно да се јавуваат во судот. На одлуките се жалеа и обвинетите кои си ги бараа пасошите назад и СЈО од каде останаа на барањето за определување на притвор. Апелацискиот суд преиначи само три решенија на првостепениот суд и одлучи да определи мерка притвор од 30 дена за Горан Грујовски, Тони Јакимовски и Никола Бошковски. Најдоцна до среда ќе се знае дали Грујевски, Јакимовски и Бошковски ќе отидат во притвор, бидејќи рокот од 48 часа почна да тече денеска.
Според Законот за кривична постапка (ЗКП), можноста за жалба до повисок суд не го одложува извршувањето во притворот, освен ако не е определено поинаку надвор од ЗКП. Меѓутоа, во решението што го донесе Советот во скопска апелација, пишува дека „мерката притвор мора да се изврши веднаш по правосилноста на решението“.
Грујевски, Јакимовски и Бошковски се обвинети во предметите „Таргет“ и „Тврдина“ кои се однесуваат на прислушкувањето телефонски броеви преку системите на Управата за безбедност и контраразузнавање (УБК) без судска наредба, односно на уништувањето на опремата со која се правело тоа. Грујевски беше началник на Петтата управа, Јакимовски шеф на кабинетот на ексдиректорот Сашо Мијалков, а Бошковски беше вработен во УБК.
