Политичкиот аналитичар д-р Сашо Орданоски, на денешната панел-дискусија на тема „Македонија: Правно и политичко лимбо“, во организација на ЦИВИЛ – Центар за слобода, постави прашање: Која влада ќе ги спроведе новите избори, ако не се договори избор на политичка влада во текот на актуелните преговори?
Професор д-р Осман Кадриу: „Оваа Влада – не! Тоа мора да биде експертска, коалициона или техничка влада. Иако јас не сум многу задоволен од досегашната форма на техничка влада, со заменици-министри, дополнителни заменици и постојано поднесување на тужби против тужби. Судовите ни се полни со пријави. Нема ефикасност, нема работење, само тужби без резултати. Мора да се води сметка за тоа каква ќе биде таа влада“.
Професор д-р Светомир Шкариќ: „Таа влада ќе мора да се договори со ‘Пржино 3’. Има време за тоа, прво, треба да видеме што ќе одлучи претседателот на државата, доколку актуелниот мандатар не успее да состави влада“.
Политичкиот аналитичар Сотир Костов: „Според мене, никако не треба да повторно да има ‘Пржино 3’. Имаме парламент кој е легално избран, и ќе се направи напор да се договорат за претседател на Собрание, ако треба, и професорот Шкариќ, може да биде. И тоа Собрание ќе одлучи дали ќе биде експертска, техничка, концентрациона влада… Не сметам дека треба да има локални и парламентарни избори заедно. Јас сум оптимист, и верувам дека Али Ахмети ќе направи влада, или со Груевски, или со Заев. СДСМ може да направи стабилно мнозинство заедно со другите партии, но не знам што Заев би можел да понуди повеќе од Груевски, а тоа да не е надвор од Уставот. Се согласувам со Кадриу, бласфемија е тоа што се случува со кривичните пријави. Но, тоа Заев го започна, тој ‘штанца’ пријави и очекувам еден дена и против себе да си поднесе пријава“.
Марија Теговска
