Кинеската делегација на Светскиот економски форум во Давос, Швајцарија, се обидува да ги увери странските инвеститори дека по тригодишна изолација од пандемијата, животот се враќа во нормала.
Сепак, податоците сугерираат поинаку: населението на Кина се намали во 2022 година за прв пат по 61 година, а економскиот раст минатата година забави на 3 проценти, што е значително под трендот во изминатата деценија, пренесува Њу Јорк Тајмс.
Зборувајќи на собирот, висок кинески функционер, Лиу Хе, изрази доверба во кинеската економија. Кризата со Ковид е „стабилизирана“, рече тој, а Кина го помина врвот на инфекции. Тој не ги спомна 60.000 жртви поврзани со коронавирусот откако беше укинат локдаунот.
Пет години претходно, Кси Џинпинг, највисокиот кинески лидер, дојде во Давос за да ја преземе улогата на глобално економско лидерство во светот нарушен со изборот на Доналд Трамп во САД и гласањето на Британија за напуштање на ЕУ. Оттогаш, САД и Европа се обединија за да ја поддржат Украина против Русија, оставајќи ја Кина меѓу неколкуте сојузници на Русија.
Кина не е единствената земја која се соочува со демографска криза. Многу развиени земји стареат, а кон средината на овој век, смртните случаи ќе почнат да ги надминуваат раѓањата ширум светот. Смената веќе почнува да ги трансформира општествата.
Падот на населението во Кина создава два големи економски предизвици, пишува Пол Кругман. Државниот пензиски систем ќе се бори да се справи со неурамнотежениот сооднос меѓу постарите возрасни лица и работоспособното население. Падот може да и наштети на севкупната продуктивност на Кина.
Подготви: Д. Мишев
