Вечерва на полноќ истекува рокот за доставување ценовници за платено политичко рекламирање на медиумите за претстојните предвремени парламентарни избори на 12 април.
ДИК во неколку наврати ги предупреди медиумите да го почитуваат рокот и да не ја надминат просечно постигнатата цена и најниска цена за платено политичко рекламирање од медиумите во последните пет изборни циклуси, согласно последните измени во Изборниот законик. Уште едно предупредување од ДИК – ценовниците не смеат да се менуваат до конечно завршување на изборниот процес, а до завршувањето на кампањата тие се должни двапати јавно да ги објават.
Сепак, нешто не штима во целата организација и начинот на кој се направени измените за платеното политичко рекламирање. Први реагираа телевизиите. Според нив, цената не смее да се ограничува. Според граѓанскиот сектор – независно од начинот на определба на цените за платено политичко рекламирање, парите не смеат да се одвојуваат од буџетот на граѓаните, односно на државата.
Истовремено, како за претседателските избори минатата година, така и за овие, сè уште преовладува ставот дека во описот на работата на ДИК, не би требало да биде распределбата и исплатата на средствата за медиумското рекламирање на учесниците во изборите. Од ДИК секогаш се на ставот дека тоа не е проблем за нив, ако законот тоа го налага тоа, тие ќе ги исполнат обврските, иако се согласуваат дека надлежноста за одредување на ценовниците треба да ги прави некој што добро ја познава медиумската тематика.
Роковите течат, измените во Изборниот законик се направија според препораките на ОБСЕ/ОДИХР, а на ДИК ѝ останува доследно да ги спроведе и како знае, во ограничениот временски прозорец, да се прилагоди на новите измени.
Клучна за ДИК ќе биде соработката со другите институции како Антикорупциска (ДКСК), Државниот завод за ревизија, Министерството за информатичко општество и администрација, МВР, МНР, а со новите измени и со Министерството за труд и социјална политика, Агенцијата за медиуми (АВМУ), но најмногу од сè, со граѓанките и граѓаните. Особено, кога на ред ќе дојде јавниот увид во Избирачкиот список.
И да не се заборави. Можеби ДИК ќе нема некоја клучна улога во политичкото финансирање на партиите, но секако фокусот ќе биде насочен кон финансиските извештаи на политичките партии и изборната корупција. Ако ништо друго, добро за ДИК ќе биде да остане транспарентна, отворена и флексибилна институција барем во односите што ги гради со граѓанските здруженија што ќе го мониторираат и овој сегмент од изборите и со Државната комисија за спречување на корупција и судир на интереси.
Биљана Јордановска