Во изминатата година се соочивме со најтешката зима и со предизвикот да менаџираме две кризи – кризата со електрична енергија и кризата со топлинска енергија, за жал се соочивме и со разни шпекулации, црни сценарија и лажни вести од одредени структури во општеството и пред се политички партии кои се покажаа како невистинити и неточни. Граѓаните имаа сигурно и стабилно снабдување со струја и топлина, порача денеска премиерот Димитар Ковачевски.
– Со многу напорна работа, посветеност и голем ангажман, можеме да кажеме дека успешно ја извршивме и ја вршиме нашата мисија во ова тешко време – сигурна електрична енергија и топлина за граѓаните, за институциите, за стопанството. Без ниту еден ден рестрикции, рече Ковачевски на денешната прес-конференција во Владата на која се презентираше Годишниот финансиски извештај на АД ЕСМ за 2022 година.
Во услови на енергетска криза, како што нагласи, АД ЕСМ во период од 1 октомври 2022 до 31 март 2023 година имаше вкупно домашно производство од 2.696.000 мегават часови електрична енергија, односно 222.131 мегават часови повеќе, за разлика од истиот период во 2017 година, кога немаше енергетска криза.
-Планирано беше да се набави електрична енергија од 392.430 мегават часови во вредност од над 146 милиони евра, но АД ЕСМ заради зголеменото производство набави помалку, односно 175.750 мегават часови електрична енергија во вредност од околу 48 милиони евра, што е заштеда од скоро 98,5 милиони евра. Ова значи дека кризата ја претворивме во можност, посочи Ковачевски.
Во февруари годинава, како што кажа,споредено со февруари 2022 година, за 80 отсто е зголемено производство на струја од производствените погони на АД ЕСМ.
-ЕСМ на 12 февруари произведе и испорача во електро-енергетскиот систем скоро 23 илјади мегават часови електрична енергија. Ова е највисоко дневно производство во последните 10 години во државата, рече Ковачевски.
Истакна дека во услови на криза не се зголеми цената на електричната енергија за домаќинствата, а за 20 отсто се намали за малите потрошувачи, кои вработуваат 98 отсто од работниците во државата.
-Тоа е спротивно на сите прогнози кои доаѓаа од целиот свет и единствено е заради зголеменото производство на електрична енергија во АД ЕСМ. Тоа овозможи да обезбедиме евтина електрична енергија за производителите на основни прехранбени производи, за училиштата и да го стабилизираме снабдувањето со електрична енергија на основните функции на државата, пред се на здравствениот систем. Заради тоа и заради другите мерки кои ги презема Министерството за економија, во делот на цените, од октомври наваму имаме намалување на инфлацијата, потенцира Ковачевски.
