Социјалната инспекција на вонредниот инспекциски надзор во ЈУ Меѓуопштински центар за социјална работа на Град Скопје утврди низа прекршувања на Законот за социјална заштита соопштува Министерството за труд и социјална политика.
„Во периодот додека Р.И. била згрижена во згрижувачко семејство и во постапката за водење старателство врз малолетното лице, констатирано е дека старателите биле често менувани и притоа отсуствувале клучните елементи од старателската функција. При поставувањето на старател, Центарот не изготвувал наод и мислење на стручен работник, наод и мислење на стручен тим и лист за следење за работа со корисникот. Од извештајот на старателот кој непосредно ја вршел старателската должност, не може да се види неговата грижа за лицето ставено под старателство, а особено за неговото здравје, издржувањето и оспособувањето за самостоен живот, за негово воспитание и образование, како и за сѐ друго што е од значење за лицето ставено под старателство“, стои во соопштението.
Од МТСП исто така велат дека Центарот во повеќе наврати давал согласнот за видување и престој на малолетната Р.И. кај нејзините родители иако им било одземено вршењето на родителското право. МТСП исто така вели дека за време на престојот кај родителите е документирано повторно присилување и наведување на питачење.
„По информациите добиени од Р.И. во октомври 2016 година дека во текот на летото имала полов однос со одредено лице, назначениот старател не повел постапка за утврдување на фактите, ниту пријавил до Министерството за внатрешни работи“, се вели во соопштението.
По промената на координаторот на предметот во јули 2017 година, утврдено е дека тој ги преземал сите потребни мерки. До МВР се доставуваат редовни пријави, а кога се појавиле индиции дека Р.И. е можна жртва на трговија со луѓе, таа е привремено сместена во шелтер центар и со неа разговарале инспектори од Одделот за организиран криминал и жртви на трговија со луѓе. И покрај овие интервенции изостанала реакција од ОЈО.
Покрај лоцирањето на одговорност во Центарот за социјална работа, МТСП паралелно ја испитува и работата на ЈУ Завод за згрижување на деца со вопитно – социјални проблеми и нарушено поведение, каде што е во тек инспекциски увид. Деталите од тој увид исто така ќе бидат споделени со јавноста.
Врз основа на досегашните наоди, МТСП подготвува прекршочни и кривични пријави за одговорни и стручни лица. Сите сознанија и докази за овој случај се доставуваат до Основното јавно обвинителство.
М.И.