Кремљ соопшти денеска дека Русија е подготвена да ја изврши улогата на посредник меѓу Северна Кореја и САД во разговорите чија цел би била намалување на тензиите, доколку двете страни имаат желба Моска да ја преземе таа улога.
– Подготвеноста на Русија да го трасира патот за деескалација е очевидна, изјави на прес-конференција портпаролот на Кремљ, Дмитриј Песков.
Рускиот министер за надворешни работи Сергеј Лавров вчера ги повика Вашингтон и Пјонгјанг да започнат преговори, нагласувајќи дека Русија е подготвена да посредува.
Според тврдењата на јужнокорејските медиуми, Северна Кореја се подготвува за лансирање сателит во вселената, што според експертите има за цел натамошен развој на технологијата на балистички ракети, додека јужнокорејските власти во официјален документ прогнозираат дека Пјонгјанг следната година ќе побара преговори со САД за своето нуклеарно оружје.
Советот за безбедност на ОН во петокот едногласно воведе нови санкции против Северна Кореја поради најновото тестирање на балистичка ракета, извршено на 29 ноември. Воведувањето на новите санкции Пјонгјанг го смета како економска блокада и акт на војна.
[divide]
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
