„Заев и СДС брутално удрија кон сите што мислат и дејствуваат македонски. Тоа е последниот чин на пресметка со слободно мислечкиот Македонец и со оние што се одважија да кажат стоп за Тиранската платформа“, изјави Груевски на прес конференција во „замокот“ на ВМРО-ДПМНЕ и замина на протестот закажан пред Основниот суд Скопје 1.
Повеќе од очигледно е тоа дека Груевски повторно ги измеша лончињата во обид за спас, не на оние кои денеска се најдоа пред очите на правдата, туку за спас на сопствената кожа.
Но, овој пат, ниту неговите повици, ниту неговото присуство на протестот пред судот, не ги охрабрија довчерашните „почитувачи на неговиот лик и дело“, за да излезат помасовно. И оние кои излегоа на денешниот протест, одново ја верглаат истата позната реторика за предавството на Заев и дефокусираат од вистинското прашање – дали конечно некој ќе поднесе одговорност за терористичкиот напад врз Собранието?
Она што беше најавено како протест, личи на панаѓур. А оние кои досега го поддржуваа во сите негови намери овој пат решија да останат дома.
Груевски по настаните од 27 април изјави дека насилниците треба да бидат најдени и изведени пред суд. Сега повикува на протест и ја обвинува власта за напад врз неговата партија. Лицемерие.
Во меѓувреме генералниот секретар на ВМРО-ДМПНЕ, Христијан Мицкоски, најави дека следните чекори на партијата и нивните приврзаници ќе зависат од развојот на настаните.
„Имаме три-четири сценарија, но за тоа ќе видиме понатаму. Според тоа што ни го кажуваа луѓе од цела Македонија, се врши неверојатен притисок луѓето да не доаѓаат на протестот. Ние сега, околу 16.30 часот, очекуваме да ни се придружат многу поголем број на луѓе, а потоа од 19 часот да допатуваат уште и од другите места во Македонија“, изјави Мицкоски.
Да се надеваме дека во тие три-четири сценарија, овој пат, нема да има сценарио како она од црниот четврток.
Маја Ивановска
видео: граѓански новинар
