ЏАБИР ДЕРАЛА
Која е веста на денот? Какво прашање е тоа? Па се разбира, третата Конференција на Обединетите Нации за океанот (UNOC3)! Зошто?
Океј, се разбира дека овој настан би бил тотално безначаен и ни оддалеку не би ги задоволил високите стандарди на македонските медиуми и уште помалку строгите критериуми на јавноста, ако на тој настан што се одржува во Ница, не учествуваше – главом и брадом – токму врховната командантка и професорка по уставно право и докажана борка за родова еднаквост и… горда македонска претседателка.
„Претседателката Гордана Сиљановска – Давкова од денеска престојува во работна посета на Ница, Франција, каде ќе учествува на третата Конференција на Обединетите Нации за океанот (UNOC3)“, објави кабинетот на претседателката – спасителка на светските океани, бранителка на школките и амбасадорка на коралните подводни гребени во егзил.
Според соопштението, нејзиното учество ќе донесе длабок стратешки увид во заштитата на океанските ресурси, особено од аголот на држава без море, но со огромен вишок на политички пена.
А дали некој помисли дека спасителката на светските океани е отидена таму само за да се дружи и замајува светските лидери, како да е некоја споредна сирена? Кој така помислил, срам да му е.
Според најавата, вредно пренесена од дежурните екипи во македонските медиуми, претседателката и ќе се обрати на конференцијата и тоа на тема „Зачувување и одржливо користење на океаните, морињата и морските ресурси за одржлив развој“, по што е сосема извесно дека планетата ќе биде спасена.
Како што се дознава од извори длабоко во македонскиот океан, говорот со месеци ѝ го спремале докажаните пропагандни гуслари и океанографи, од кои едниот носи прекар според презимето на еден германски министер од 30-години на минатиот век, а на другиот не му го знам прекарот, само знам дека, наместо вода, со години пие унгарско масло, за да ги заштити светските океани. Тие, пак, го користеле неизмерното искуство на нивниот главен советодавец по морски прашања, пензиониран рибар од Прилеп кој никогаш не видел море, но цел живот елоквентно тврди дека чувствува прилив и одлив секој вторник.
Но тоа не е сѐ, драги љубители на океаните и морињата. Од длабочините на светските океани и мориња пристигна уште една ексклузивна вест. Парламентарниот совет на сирените едногласно усвои декларација македонската претседателка да биде прогласена за почесна сирена – спасителка на океаните. Богот Нептун, трогнат од интелектуалниот и спиритуален капацитет на нашата врховна командантка, ја прекинал својата милениумска медитација под морското дно и, во свечена подводна церемонија, ѝ врачил златен сандак полн со алги од Атлантида и бисери што плачеле од радост. Се открива дека на сандакот има порака направена од скапоцени школки: ‘Гордана, само ти можеш да го сочуваш синилото на планетата – и достоинството на сирените!’
ЕУ интеграции? Усогласување со стратегиите на НАТО? Решавање на статусот на Бугарите во земјава? Ајде, ве молам… Зарем со такви приземни, здодевни прашања ќе се расејуваме кога имаме океани за спасување и сирени што чекаат лидерство? Па тоа се вчерашни теми! Денеска, вистинските визионери гледаат подлабоко – под морското дно.
Ете, океаните дочекаа спас – од нашата горда претседателка. А македонските граѓанки и граѓани? Тие можат мирно да продолжат да се дават во сиромаштија, корупција, неизвесност и еднонасочна пропагандна струја од телевизиските екрани. Но не грижете се. Кога ќе дојде цунамито – буквално или метафорично – ќе имаме сертифициран експерт за океани во претседателската фотелја. Со диплома од Ница, декларација од сирените и благослов од Нептун лично. И ќе нѐ спаси. Без сомнеж. Или барем ќе даде изјава дека сѐ е под контрола. Во овој мудар, мирољубив и мултиполарен свет.
