„Украина – година на хероизмот“ е заедничкиот наслов на големата конференција што се одржа на 24 февруари, во Домот на АРМ, во организација на ЦИВИЛ и украинската амбасада во Северна Македонија. Конференцијата беше поделена на три сесии.
На првата сесија говорници беа македонскиот државен врз и амбасадорката на Украина во Северна Македонија, Ларис Дир.
Сесијата ја отвори претседателот на ЦИВИЛ, Џабир Дерала, со повик за едноминутно молчење.
Како говорници на првата сесија се обратија Претседателот Стево Пендаровски, Претседателот на Собранието, Талат Џафери, Вицепремиерот за европски прашања, Бојан Маричиќ, Министерката за одбрана, Славјанка Петровска и Државниот секретар во МНР, Филип Тосевски.
„Путин својата војна ја нарече специјална воена операција за денацификација и ослободување на Украина и заштита на Русите од геноцид. Но со својот ракетен терор уништи и сѐ уште уништува цивилни домови и инфраструктура, срамни со земјата цели градови, а неговата садистичка солдатеска ограбува, измачкува, силува и убива мажи, жени, деца и возрасни луѓе. Меѓу нив има и Руси“, изјави Џабир Дерала, во воведното обраќање.
Стево Пендаровски, претседател на Северна Македонија
Денес, изминува точно една година од почетокот на бруталната руска воена агресија врз Украина, која го втурна украински народ во невидени страдања, загуба на човечки животи и ужасна деструкција. А, сите нас останатите не соочи со фактот дека во Европа повторно се води крвав конфликт кој предизвикува хуманитарна, економска, енергетска и безбедносна криза. Станува збор за трагедија која влезе во нашите домови и во нашите мисли и пред која немаме право да останеме без зборови.
Талат Џафери, претседател на Собрание на Северна Македонија
Јас сум прв претседател на Собрание од регионот кој што отиде во Украина, за лично и институционално да ја изразам поддршката за украинскиот народ и институции. Со оглед на моето воено минато, човек би рекол дека ништо не може да ме изненади. Меѓутоа, не е така! Човек никогаш не може да биде доволно подготвен за суровоста на другиот човек. Соочен со бројот на загубените животи, разрушената инфраструктура и влегувањето на Украина во една целосно поинаква димензија на егзистенција, се обврзав дека ќе се заложам за помош со сета моја моќ. Истовремено, восхитен од храброста, посветеноста, пожртвуваноста и смиреноста на украинските водачи и граѓани, истрајни во праведната борба за слобода.
Н.Е. Амбасадорка на Украина во Северна Македонија, Лариса Дир
Храброста на Украинците сега мора да биде поддржана со тенкови, оружје со долг дострел и борбени авиони. Украинците го даваат својот живот не само бранејќи ја својата суверена територија, Украинците ги бранат вредностите според кои демократскиот цивилизиран свет живее.
Бојан Маричиќ, вицепремиер за европски прашања
Помина точно една година од најавуваната руска агресија врз Украина и од огласувањето на сирените за воздушен напад во главниот град на Кијив. Рускиот напад врз Украина е напад на европските вредности. Затоа ние, како Македонци и како Република Северна Македонија, ни беше многу едноставно да направиме морален избор, да застанеме на страната на Украина.
Славјанка Петровска, министерка за одбрана
Му се поклонувам на украинскиот народ кој на светот му покажа дека љубовта кон сопствената татковина е посилна од оружјето на агресорот… Ова е година на херојство во која украинскиот народ против целосната руска инвазија на Украина покажа што може за својата татковина. Но и година на единство и сојузништво на европскиот континент.
Филип Тосевски, државниот секретар во МНР
Горди сме на нашите украински пријатели во истрајноста да ја одбранат својата земја и принципите на демократијата и слободата. Истовремено целата меѓународна заедница мора да остане обединета и посветена овие страшни злосторства против украинскиот народ да бидат соодветно и правично процесиурани, а извршителите да одговараат пред лицето на правдата.
Подготви: Б. Јордановска
Монтажа: Ариан Мехмети
