Манипулациите на колешката Силјановска: Научно и политичко фијаско!

ТИТО БЕЛИЧАНЕЦ

Колешката бидејќи немаше издржани правни аргументи да го одбрани негативниот став за прифаќањето на уставните измени од страна на нејзиното ВМРО ДПМНЕ во излагањето. Вон контекст се повикуваше на научни мислења и одредби од меѓународни договори, но не и на правните акти на ЕУ.

Од многуте конфузни ставови од нејзиното излагање ќе се задржам на четири.

Првиот: Патот кон ЕУ не одел преку Брисел туку преку Софија

Кога Македонија поднесуваше барање за членство во ЕУ, знаеше дека патот оди преку Брисел и со согласност на сите членки. И дека согласноста се постигнува со тешки преговори меѓу членките во кои требаше да се совлада бугарскиот национален нихилизам кон македонската нација и јазик.

Вториот: Не била преговарачката рамка основ за влез во ЕУ туку член 8 од Лисабонскиот договор и други бројни меѓународни договори кои предвидуваат реципроцитет и гарантирање на малцинските права

Се разбира, бесмислена и воопштена изјава, со цел да се создаде магла. Притоа, таа не наведува ниту еден правен и научен аргумент. ЕУ има свои правни принципи, врз кои е основана и функционира, а пред сè, тоа е консензуален начин на донесувањето на одлуките за прием на нови членови.

Третиот: Преговарачката рамка не е политичко тенгало кое може да се препреговара меѓу кандидатот за член во ЕУ и ЕУ

Општо познато е дека условите за влез во ЕУ и почеток на преговори ги утврдуваат, консензуално, членовите на ЕУ и условите не се предмет на преговори меѓу кандидатот за член во ЕУ и ЕУ. Усвоената преговарачка рамка не може да се менува без согласност на сите членки на ЕУ, во случајот и Бугарија. Принципот е „земи или остави“. Оттаму, ако овој предлог биде одбиен од Собранието на Македонија, се почнува со нова процедура за која не се знаат условите и времето кога ќе биде покрената. А да не зборуваме за прашањето кога консензуално ќе биде усвоена.

Четвртиот: Преговарачката рамка ја усвојуваат граѓаните на референдум

Според Уставот, преговарачката рамка за влез во ЕУ ја усвојува Владата, а условите под кои ќе се водат преговорите, ги утврдува Собранието со мнозинство пратеници од вкупниот број на пратениците. Како што беше случај со Македонија.

Додека одлуката за стапување или истапување од сојуз или заедница со други држави, како што е одлуката за влез на Македонија во ЕУ, по успешно завршените преговори, согласно став 3 од член 120 од Уставот, се смета за усвоена, ако на референдум за неа гласало мнозинството од вкупниот број избирачи.

Накусо – научно и политичко фијаско!

Текстот е личен став на Авторот.