Одговорајќи на новинарско прашање дали е задоволен од изречените казни за Иџет Мемети и Наќе Георгиев после спогодбата со Обвинителството, премиерот Мицкоски ја искористи можноста да ја промовира својата идеја за распуштање на судскиот и обвинителскиот совет, а секако и да ја пофали работата на својот пријател, министерот за внатрешни работи, Тошковски. Притоа, „тефтерчињата“ во судството им го припиша и на „едно минато“ и на власта на СДСМ и ДУИ.
Мицкоски потенцираше дека е задоволен што во техничката влада МВР спровело акција, која покажала дека има корумпирани судии во највисокото тело – во Врховниот суд, објави државната новинска агенција МИА.
„Прво, сакам да изразам задоволство што во техничката влада МВР спроведе перфектна акција кога за првпат на дело покажа дека имаме корумпирани судии во највисокото тело, тоа е Врховниот суд. Ако вие имате корумпирани судии коишто се во највисокото тело, а тоа е Врховниот суд, тогаш можете да замислите што се случува надолу. Понатаму, во истрагата се потврди дека не бил сам врховниот судија, туку и лицето за кое што исто така постои спогодба со Обвинителството, а тоа е Иџет Мемети како претседател на Советот на јавни обвинители. Јасна е спрегата меѓу судско-обвинителскиот систем кај нас. Затоа довербата е два проценти. Затоа што едни тефтерчиња од едно минато се заменија со други тефтерчиња, само овие се од Струмица, од „Бихаќка“ и од Речица. Сè додека имаме тефтерчиња и сè додека не се распуштат овие луѓе, нема да имаме правна држава“, изјави Мицкоски, по посетата на Универзитетската клиника за дигестивна хирургија во Скопје, пренесе МИА.
Основното јавно обвинителство за гонење на организиран криминал и корупција вчера склучи спогодба со осомничениот судија во Врховен суд, Наќе Георгиев, за кој постоеше основано сомнение дека сторил кривично дело „Примање награда за противзаконито влијание“. Георгиев прифатил да му биде изречена казна затвор од три години, и забрана за вршење на професија.
Претходно, и членот на Советот на јавни обвинители, Иџет Мемети се спогодил со Обвинителството. Признал дека примил награда за противзаконито влијание, во случајот во кој првоосомничен е врховниот судија Наќе Георгиев. По спогодбата, Мемети е осуден на условна казна и доби забрана за вршење на дејност во рок од три години.
Осомничени за примање награда за противзаконито влијание, на Мемети му се закануваше казна затвор од една до пет години, а на Георгиев од една до десет години.
Извор: МИА
