Денот на човековите права е потсетување дека демократијата не опстојува сама од себе, туку преку активното учество и будност на граѓаните. Во време на војни, дезинформации и сериозни удари врз слободите, молкот станува простор во кој неправдата се шири. Украина и понатаму се бори за своето право на слобода и достоинствен живот, додека страдањата во Газа укажуваат на длабока криза на човечноста и одговорноста на меѓународната заедница.
„Молкот пред масовни злосторства е соучесништво“ — порачува ЦИВИЛ меѓу другото во ова видео обраќање.
Овие случувања се јасен сигнал дека човековите права се ранливи секогаш кога изостанува храброста да се реагира. Кога институциите се под притисок, а пропагандата ја потиснува вистината, ЦИВИЛ порачува дека демократските процеси можат да се одбранат само со активни, информирани и одговорни граѓани. Одбраната на слободата не е еднократен чин, туку секојдневна посветеност да се спротивставиме на неправдата, корупцијата и насилството.
Овој ден нека биде потсетување дека секој има улога во заштитата на човековите права. Да не остануваме настрана кога тие се загрозени, туку да застанеме зад вредностите што ја градат праведната и слободна иднина. Само така ја чуваме човечноста и ги зајакнуваме темелите на демократијата — се вели во соопштението на ЦИВИЛ по повод Денот на човековите права.
Ден на човековите права 2025: Кога демократијата е под напад, молкот е соучесништво
