Премиерите Зоран Заев и Алексис Ципрас ќе се сретнат на Светскиот економски форум во Давос, денеска попладне. Оваа средба ќе се одржи во денови на зајакнати активности на двете влади и обновени националистички тонови на двете страни од границата. За среќа, националистите и во двете земји се во опозиција во овој период. И македонскиот и грчкиот премиер покажаа лидерска зрелост и волја да го надминат апсурдниот децениски спор околу името на Република Македонија, кој им нанесува големи штети на двете земји.
Двајцата лидери ќе се сретнат денеска со цел лично да се уверат во подготвеноста да постигнат решение за спорот.
Денешната средба има шанси да биде момент на вистината, кога и Заев и Ципрас ќе имаат можност да ги повлечат првите решителни (иако неформални) потези и, да се надеваме, ќе поведат искрен и конструктивен разговор за горливата тема. Очекувањата се високи. И двајцата лидери до сега излегоа со храбри и визионерски изјави кои ги приближија земјите за прв пат по осамостојувањето на Македонија од некогашната југословенска федерација. Како што објави ЦИВИЛ Медиа, Ципрас деновиве изјави дека „ќе биде национална глупост да не се искористи шансата за решение на спорот“ и дека е решен да го надмине спорот, без оглед на штетата што ќе ја претрпи.
Голем проблем на грчките националисти им е и Уставот на Македонија, поточно, членот 49, за “правата на луѓето што припаѓаат на македонскиот народ во соседните земји и раселени Македонци”, што тие го толкуваат како иредентизам.
Ципрас се соочува со сериозни предизвици дома. Ужива огромна поддршка во јавноста, но и жестоки противници, дури и во редовите на коалиционата влада која ја предводи. Иако не е премногу гласен, коалициониот партнер Панос Каменос, лидерот на Независни Грци (Анел), се противи на решение за името кое ќе го содржи зборот Македонија. Министерот за внатрешни работи, Панос Скурнитис, кој е од редовите на владејачката СИРИЗА, изјави дека “Каменос ја изразува позицијата на својата партија, а не на владата” и ја повика АНЕЛ да не го минираат „вистинскиот национална напор кој е во тек”.
И црквата се подели по ова прашање. Додека верскиот лидер, архиепископот Иеронимос го поддржува Ципрас, солунскиот митрополит Антимос е еден од предводниците на протестите против компромисно решение на спорот со името. Синодот закажа средба во петок, на која ќе се направи обид да се усогласи ставот по ова прашање. Во меѓувреме, се подготвува уште еден протест против компромис со Македонија на 4 февруари.
Џ.Д.
