Рускиот министер за надворешни работи Сергеј Лавров денеска најави дека Русија ќе побара пристап до новинарите од агенцијата РИА Новости кои се приведени во Украина.
Руската државна новинска агенција Риа Новости претходно соопшти дека е спроведена рација во нејзиното дописништво во Киев и оти шефот на канцеларијата бил задржан на испрашување.
Портпаролот на Кремљ, Дмитриј Песков рече дека Москва реципрочно ќе реагира на потезите на украинската служба за безбедност против руските медиуми и оти ќе ги брани интересите на новинарите.
– Реципрочни мерки сигурно ќе бидат преземени, но за да можеме да кажеме нешто повеќе прво мораме да добиеме подетални информации, рече Песков.
Службата за безбедност на Украина денеска изврши рации во украинските дописништва на РИА Новости и Раша тудеј.
РИА Новости информираше дека нејзиниот уредник, Кирил Вишински, бил притворен.
Главната уредничка на Раша тудеј, Маргарита Симоњан на Твитер напиша дека телефонските врски во нивната канцеарија во Киев се блокирани и оти нивната украинска Интернет страница е соборена.
Украинската безбедносна агенција потврди дека спровела рација во двата медиуми. Во соопштението се наведува дека се истражува мрежа на медиуми кои ги контролира руската Влада, а се користат како оружје во хибридна војна против Украина. (МИА)
