ЦИВИЛ и оваа година спроведува проекти и активности за промовирање на мултикултурализмот и европските вредности во нашето општество. Еден од тие проекти е „Заедно за подобра иднина“ со поддршка од Министерството за надворешни работи на Големото Војводство Луксембург.
Во рамките на проектот, ЦИВИЛ подготвува анализа на состојбите на локално ниво. Со таа цел, испративме прашања до сите единици на локалната самоуправа со прашања за начинот на промоција и заштита на заштитува мултикултурализмот и европските вредности во нивната општина, како тие како локална самоуправа ги негуваат европските вредности и кои се нивните препораки до институциите на национално ниво.
Одговор добивме и од Општина Штип. Од нивните одговори се заклучува дека мултикултурализмот е успешна приказна во Штип, а локалната самоуправа го негува и заштитува мултикултурализмот во Општината. Државата, пак, ја има водечката улога во креирањето на политиките за соживот.
Во продолжение одговорот на доц.д-р Соња Николова, советничка за основно образование во Општина Штип:
„Имајќи го предвид етничкиот состав на населението во општина Штип (Според официјалните податоци од Пописот во 2002 г. во однос на етничкиот состав на населението во Штип, 87,18% се Македонци, 2,66% Турци, 4,59% Роми, 4,34% Власи и 1,23% останати, а според Пописот од 2021 77,5% се Македонци, 5,1% Роми, 3,5% Власи и 3,0% Турци. Останатите етнички заедници како Срби, Бошњаци, Албанци, Хрвати и др. се застапени со 1,1% ) општината припаѓа во редот на мултикултурни општини во регионот, а во тие рамки и општинските училишта се со мултиетнички состав. Токму поради ваквата етничка разноликост во училиштата, општина Штип континуирано ја следи и унапредува соработката во подрачјето на меѓуетничката интеграција, почитувањето на различностите, негувајќи ја мултиетничката и мултикултурна средина во образовните институции градејќи мултикултурна образовна интеграција.
Локалната самоуправа е основач на општинските училишта и преку нејзините органи и тела, како и преку донесување на одлуки во Советот на Општина Штип се промовира, заштитува и се негува мултикултурализмот. Во надлежност на Советот на Општина Штип се донесуваат следните документи кои се законската рамка, основа за сите понатамошни активности во делот на општинските училишта :
Донесување на Програми за образование во предучилишното, основното и средно образование, Стратегијата за МИО и МУ (меѓуетничка интеграција и младинско учество), Реонизацијата на јавните основни училишта на територијата на општина Штип.
Во општина Штип постои и „Одделение за услуги и информирање на граѓаните” кое работи како своевиден центар за односи со етничките заедниците каде вработените референти со својот работен ангажман успешно ги решаваат проблемите и потребите на граѓаните особено од ромската етничка заедница и доколку се јави потреба се координираат со останатите општински институции. Советот на Општина Штип на своите редовни седници ги усвојува акциските планови по кои овие вработени понатаму постапуваат и работно се ангажираат.
Се поставува прашањето кога, каде и дали во ваквите случаи државата треба да реагира. Државата со нејзиниот институционален апарат ја креира стратегијата, политиката, законитоста и нејзиното спроведување во пракса. Не преземањето ништо и одобрувањето на ваквите постапки и отстапки, кои се стекнуваат по пат на политички уцени е ПРИМЕР и МОДЕЛ како НЕ ТРЕБА една сериозна држава претендент за членство во Европска Унија да постапува. Органите на Власта со целиот свој институционален механизам, ја имаат слободата но и одговорноста во креирањето на политиката и нејзиното спроведување.
Успешното решавање на вакви суштински прашања како што е прашањето за соживот во една мултиетничка, мултикултурна и мултиконфесионална држава бара политичка волја но и искрен ангажман од сите етнички чинители. Партиципативното учество значи не само барање придобивки туку и активен однос за градење на политики кои ќе доведат до реално заедничко живеење, признавање и почитување на различностите но и зачувување и негување на одликите на секоја етничката заедница.
Во таа смисла државата со нејзините механизми ја има водечката улога во креирањето на политиките за соживот како на државно, така и на локално ниво, а резултатите од нејзиното владеење ги чувствуваме сите.
