„Македонија ќе биде правна држава, а секој кој направил какво било криминално дело, ќе понесе одговорност, без разлика на неговата етничка, религиозна, партиска и каква било припадност“, потенцира СДСМ во соопштението – реакција на обвинувањата на ВМРО-ДПМНЕ дека „СЈО е инструмент за политички прогон на опозицијата“.
„Кривичните постапки на СЈО се тенденциозни и политички мотивирани. Сите акции кои ги презема СЈО се во насока на оцрнување на раководството на ВМРО-ДПМНЕ, по налог на Зоран Заев. Заев јавно говореше дека не ги признава судските одлуки и не одеше на рочишта, а судот му го врати пасошот. Охрабрени од ваквите привилегии за Зоран Заев, кој има третман дека е над законот, СЈО се впушти во политичка авантура неосновано да бара мерки за обезбедување за неговите неистомисленици. Раководството на ВМРО-ДПМНЕ нема намера да ја опструира правдата, затоа што не сторило ниту едно кривично дело и секогаш работело според Уставот и законот“, изјави денеска Бојан Стојановски од ВМРО-ДПМНЕ.
Според него, се поставува прашањето дали Заев мисли дека на ваков начин, преку нарачан политички прогон, ќе успее да изврши притисок врз ВМРО-ДПМНЕ, за да ги протне антидржавните политики?
„Не една, туку сто ‘Катици’ нема да му помогнат. Не 20, туку 200 политички конструирани обвиненија нема да му завршат работа. Почнувајќи од ‘Титаник’, преку измислените ‘тврдини’, ‘траектории’ и ‘тенкови’, сите обвиненија се без основа и срам за правосудниот систем и за оние кои ги конструирале…“, рече Стојаноски, кој потенцираше дека „Катица Јанева и нејзините соработници се чуствуваат моќни и недопирливи мислејќи дека Заев вечно ќе владее. Реалноста не е таква. Заев ќе ја загуби власта и ќе се врати правната држава, а секој ќе сноси одговорност за незаконското работење“.
„Заврши времето кога ВМРО-ДПМНЕ вршеше притисоци врз судството, реформите носат професионално и независно правосудство“, се вели во реакцијата на СДСМ на изјавата на Стојаноски.
„ВМРО-ДПМНЕ – 11 години го партизираше судството, а преку ‘Сваровски’ инсталациите од тефтерот на Гордана Јанкулоска, го злоупотребуваше правосудниот систем да врши прогон и да се пресметува со неистомислениците на Никола Груевски и неговите соработници… Денес, кога раководството на ВМРО-ДПМНЕ се соочува со одговорноста за сето она што им го направи на граѓаните и државата, ВМРО-ДПМНЕ во страв и очај продолжува преку секојдневни прес-конференции пред правосудните институции, да врши притисок и да се заканува на судии и обвинители“,се вели во соопштението на СДСМ.
„Заврши времето кога ВМРО-ДПМНЕ вршеше притисок врз судиите и нарачуваше судски предмети и пресуди. Реформите во судството кои ќе се спроведуваат согласно најдобрите европски пракси, носат професионално и независно судство и го враќаат угледот на судството што ВМРО-ДПМНЕ го наруши“, соопштува СДСМ.
