Облечени со топла облека, седиме и спиеме во топли домови, меѓутоа, сепак на средба со пријателки и пријатели се жалиме дека премногу ни студело и дека ова не се трпело. Забораваме и губиме емпатија за нашите сограѓан(к)и, кои ова ладно време го поминуваат на улица, а системот никако да најде решение.
Моралната одговорност ги поттикна граѓанк(к)ите да преземат иницијатива, каде што ќе се потрудат да им понудат помош на беспомошните. Организаторите на оваа иницијатива, порачуваат овој хуман гест да се применува секаде… во секое маало, во секоја општина, да закачите своја јакна на тие дрва што веќе ни останаа.
На фејсбук настанот „На секој му треба топлина“, организаторите ги повикуваат граѓанките и граѓаните на 4, 5 и 6 декември од 13 до 18 часот да ги остават јакните кои не им се потребни во центарот на Скопје, но и во сите општини во градот.
„Ајде да помогнеме! Идат зимски денови и има луѓе на кои можеме да им помогнеме! Идејата е на 4,5 и 6 Декември од 13 часот до 18 часот да ги собереме јакните кои не ни се потребни нам – но на некој друг живот му значат – и да ги ставиме низ центарот и околината на Скопје – за да може секој на кој му треба топлина да се згрее во овие студени ноќи и денови. Сите вие кои сакате да ги донирате вашите јакни може да го сторите тоа во определените денови. Ајде дечки можеме ние да го направиме ова! И секој кој сака да се приклучи и да помогне е добредојден! Се зависи од бројот на јакните кои ќе бидат собрани. Дел ќе се остават низ Скопје за да можат да ги земат луѓето кои што не се во можност да дојдат до пунктовите и луѓето кои се на улиците како и социјално загрозените. Дел лично ќе ги поделиме на бездомниците, а останатите ќе ги однесеме на пунктовите каде што веќе се собираат донации, за луѓето на кои што им се потребни.
Другари вие што не сте во можност да присуствувате во одредените денови, слободно може да го направите истото на своја рака во својата општина. Закачете ја својата јакна на било кое дрво – сигурно ќе се најде некој на кого му е потребна топлина“, стои во повикот.
Ф.Х.
