Новинарска екипа на телевизија Алсат утрово била грубо спречена да ја врши својата работа за време на протест пред Општина Чашка, кој се одржувал против воведување паралелка на албански јазик во основното училиште „Тодор Јанев“ во Чашка. Извикувањата кон снимателот и обидите за покривање на камерата на телевизијата се слушаат во видеото што го објави Алсат.
Овој крајно недоличен потег кон екипата на Алсат од страна на граѓаните на Чашка следува еден ден покасно откако пратеникот на Левица, Борислав Крмов и советникот во општина Велес, Димитар Абрашев, на (23.01.2024) ги нахушкаа жителите да се борат против “великоалбанската агенда“ кои притоа се судрија со полицијата недозволијќи и на директорката на ООУ „Тодор Јанев”, Елена Николова да влезе во училиштето.
Исто така и пратеникот на ВМРО-ДПМНЕ, Игор Здравковски на 23 јануари 2024 година одржа состанок со родителите на учениците, жителите на Чашка во просториите на Општинскиот комитет на ВМРО-ДПМНЕ пришто ги поттикна да продолжат со бојкотот на наставата.
Здружението на новинарите на Македонија (ЗНМ) и Самостојниот синдикат на новинарите и медиумските работници (ССНМ), реагираат и бараат објаснување од Општината во врска со спречувањето на новинарската екипа да влезе во јавна установа.
„Откако колегата Авни Тахири и снимателот Новица Апостолоски пристигнале пред општината, дел од луѓето што протестираат им забраниле пристап и влез во општината и почнале вербално да ги напаѓаат, притоа пробале и физички да ја тргнат камерата, како што се гледа и од видеото објавено на официјалната Фејсбук страната на ТВ Алсат“, се вели во реакцијата на ЗНМ и ССНМ.
Од ЗНМ и ССНМ велат дека, по кратка недолична конверзација, лицето што се обидело да го избрка снимателот, влегло во општината и не дозволило влез на новинарската екипа.
Според кажувањето на Тахири, по завршување на инцидентот, тие повторно се обиделе да влезат во општината со цел да земат изјава од градоначалникот, но уште еднаш биле спречени да влезат, овој пат од чуварот во општината.
ЗНМ и ССНМ истакнуваат дека односот кон новинарите и медиумите кои работат на терен е од критична важност за слободата на информирање и изразување во демократското општество.
„Насилството и спречувањето на новинарите да ја извршуваат својата професионална задача е неприфатливо, не е во сообразност со демократските вредности и придонесува кон цензура“, стои во реакцијата на новинарските организации.
И од ЦИВИЛ најостро го осудуваат овој инцидент и најавуваат дека ќе бараат одговорност и законски санкции за строителите и поттикнувачите.
фото: Принтскрин од видео на ТВ Алсат