Интернет-порталот „Глобал фајерпауер“ ја објави најновата листа на 145 земји рангирани според нивната воена сила за 2023 година. На листата за воената моќ на државите, Македонија оваа година е позиционирана на 108-та позиција, што во споредба од лани е напредок за македонската армија за цели 27 места на листата за воена способност и моќ на армиите во светот.
Како што е наведено на веб-страницата „Глобал фајерпауер“ повеќе од 60 индивидуални фактори, како што се бројот на воени единици, финансиите, логистичките способности и географијата, се користат за креирање на рангирањето.
Кога станува збор за регионот, Србија е најмоќна во регионот и е на 58. место. Хрватска е на 69. место, Словенија на 86. место, Северна Македонија на 108. место, Црна Гора на 128. и Босна и Херцеговина на 133. место. Косово е на 134. место на листата. Во првите 10 земји на листата се: САД, Русија, Кина, Индија, Велика Британија, Јужна Кореја, Пакистан, Јапонија, Франција и Италија. Украина е дури на 15. место.
За потсетување, Македонија досега само седум пати беше вбројувана во рангирањата на „Глобал фајерпауер“. Првпат во 2017 г. сајтот ја рангираше нашата војска на тогаш највисокото 116-то место на листата на држави. Наредната 2018 година, АРСМ беше сместена пониско за шест позиции, односно беше поставена на 122-то место на табелата. Во 2019 година, АРСМ беше сместена пак на 118-то место, додека во 2021 таа беше позиционирана на 133-то место на листата на „Глобал фајерпауер“.
Ова е највисок скок во позиции кога станува збор рангирањето на македонската армија што се должи на вложувањето и модернизацијата во одбраната, зголемувањето на буџетот на земјава за оваа намена како и влегувањето во НАТО сојузот.
Хронологија на рангирањата на македонската армија
Година и позиција на табелата
2023 – 108.
2022 – 135.
2021 – 133.
2020 – 127.
2019 – 118.
2018 – 122.
2017 – 116.
Извор: Слободен печат
