Политичката констелација во Македонија е сложена и крајно сериозна, а безбедносната состојба е кревка. Излез на повидок – нема! Продолжуваат протестите под мотото „За заедничка Македонија“, со учесници, потврдени членови на ВМРО-ДПМНЕ, но и граѓани – поддржувачи на нивните политики. Повлекување на т.н. Тиранска платформа е нивното основно барање. Минатата недела и ВМРО-ДПМНЕ донесе Манифест, со којшто декларативно става акцент на демократијата, зачувување на унитарноста на државата, нејзина политичка стабилност, раст на економијата… СДСМ без прекин најавува „доаѓање на нова реформска влада“, којашто ќе ја врати демократијата, владеењето на правото, консолидација на здравствениот систем, образованието…
Маратонска конститутивна седница во Собранието
Денеска се одржа шестото продолжение на конститутивната седница во македонското Собрание. И натаму, на дневен ред е расправата за избор на претседател, заменик на претседателот, членови и нивни заменици на Комисијата за прашања на изборите и именувањата. Во старт се пријавени за првата точка, 51 пратеник за дискусија. Процедурални забелешки и меѓусебни надмудрувања за тоа кој што направил за државата и граѓаните се главно причините, што оваа седница стана маратонска.
Додека пратениците од ВМРО-ДПМНЕ бараат отфрлање на т.н. Тиранска платформа или распишување нови парламентарни избори, заедно со локалните, од СДСМ се децидни дека треба да се изберат членовите на комисијата. Потоа, бараат да се избере претседател на Собранието и да се гласа Програмата на идната влада.
Манифестот на ВМРО-ДПМНЕ, неуспешен обид за враќање на Груевски?
Во време на масовни протести на граѓаните против т.н. Тиранска платформа, за кои што е јасно дека се поддржани од членството и симпатизерите на ВМРО-ДПМНЕ, оваа партија усвои и Манифест за национално обединување за прашањата што се од заеднички интерес за граѓаните. ВМРО–ДПМНЕ нуди мнозински изборен модел или бонус од 20 пратеници за победникот на парламентарните избори. Вака, сметаат од партијата, ќе се постигне политичка стабилност.
Потсетувајќи дека оваа е 2017, а не 1903 година, СДСМ обвинува дека раководството на ВМРО-ДПМНЕ е составено од криминалци, кои бараат спас за сопствената кожа: „Спасители на државата се граѓаните што избраа промени. Затоа т.н. Манифест на ВМРО-ДПМНЕ не е ништо друго, туку неуспешен обид за враќање дефакторизираниот Груевски во политичкиот живот“.
СДСМ бара итен и мирен трансфер на власта. Аналитичарите во некои национални медиуми, Манифестот на ВМРО-ДПМНЕ го оценија како „лицемерна тактика и манипулативна стратегија којашто не нуди излез од кризата“.
ДУИ размислува да ги повлече сите министри од Владата
Наводите за повлекување на сите министри од ДУИ од техничката влада предизвикаа реакции и меѓу парламентарните партии, но и во јавноста. Според експертите, постои опасност Македонија да се соочи со правен вакум од којшто тешко ќе се излезе.
Партиите од парламентарното мнозинство се со став дека повлекувањето на ДУИ од техничката влада, особено во министерствата каде што нема заменици министри, како МВР, ќе предизвика сериозни проблеми. Од една страна, нема кој да ги констатира оставките во Собранието. А, фактот што не е избран новиот спикер на парламентот е кочница за избор на нова влада.
Според Беса ова е евтин трик на ДУИ, со којшто не се деблокира Собранието, туку се доусложнува политичката состојба. Од Алијансата за Албанците сметаат дека е лицемерно и непринципиелно ДУИ од една страна да го поддржи Заев во формирање нова влада, а од друга, да ја дели власта со ВМРО-ДПМНЕ.
ВМРО-ДПМНЕ бара од ДУИ подобро да ги објаснува своите одлуки. Од СДСМ останаа воздржани за коментири на новите постапки, најавени од Мала Речица.
Партијата „Достоинство“ побара министрите од ВМРО-ДПМНЕ да поднесат неотповиклива оставка, наместо да бидат во коалиција со оние, што според нив, ѝсе закануваат на Македонија.
Кризата сѐ подлабока, граѓаните турнати на маргините
Следење на сите детали на релевантните политички партии во Македонија, посетите, нови чекори на меѓународната заедница – со цел што поскоро решавање на политичката криза, стана секојдневие речиси на сите граѓани. За жал, во оваа констелација, реалниот живот на граѓаните е турнат на маргините. Околу 200 работници на фабриката „Леар“, отворена во ТИРЗ Тетово како странска инвестиција, се затруени со стафилокок, според првичните информации од Агенцијата за храна и ветеринарство.
Околу 250 други работници од фабриката „Зона Трико“ од Виница на протест бараат исплата на заостанати осум плати од минатата година, откако на нивните трансакциски сметки им била исплатена нето плата од по 1 денар и тоа само за четири месеци!
Голем број жители, жртви на поплавите (06.август, 2016г.) во скопско Стајковци реагираат и се жалат дека владниот аванс не им е доволен за санација на штетите и повторна адаптација на нивните домови.
Но, за министерот за труд и социјална политика, Ибрахим Ибрахими нема причина, зошто сѐ уште некои жители би биле и натаму сместени во домовите, кога временските услови дозволуваат да се вратат во своите живеалишта.
Кој ќе го пресе „гордиевиот јазол“ за Македонија?
Секој чекор во и на парламентарните партии, особено на ВМРО-ДПМНЕ и лидерот Никола Груевски и на СДСМ и лидерот Зоран Заев е под лупата на меѓународната заедница. Оттаму доаѓаат многу децидни пораки, дека претседателот Ѓорге Иванов треба да му го даде мандатот на Зоран Заев, откако тој ја доби довербата од 67 пратеници, парламентарно мнозинство во новиот собраниски состав, што брои 120 пратеници.
Денеска претседателот на Европскиот совет Донал Туск и претседателот Иванов имаа тет-а-тет средба, на јасна тема – итно решение на македонската криза.
Но, и по оваа средба останува дилемата, кој ќе го пресече „гордиевиот јазол за Македонија?
Моника Талеска
